U MLA ka BJP na Pynthorumkhrah uwa man leh u Montri sorkar, u Alexander Laloo Hek da kyntait u wa da yaklam u wa u MLA uwa man leh uwa yahkhmat ka Trinamool Congress, u Dr. Mukul Sangma yow pynhaap ya ka sorkar Meghalaya Democratic Alliance (MDA-II).
Ini i klam u Hek toh hadien chi sngi wa u MLA ka Liang Pyrchah, u Dr. Mukul Sangma da kyntait u ya ki khubor wow psiah cha ka BJP wei hadien i kam yong u Dr. Mukul wa daw mih i jia i wow man pyrchah ya ka sorkar MDA-II ha ki kajiak sngi wow wan.
Uwa yahkhmat ka BJP da pynsñiaw u yei lynngoh yei mih khubor wei da ong u wa hadien wa da chna sorkar ym em yachem u wa u Dr. Mukul. Chooh chooh da ong u wa da yachem u wa u Dr. Mukul du ha i por wa lai dih cha lang ha kamra yong u Lamphang ha ki sngi wa em ka dorbar mang tangka, heiwa da yaklam danda wow psiah noh ha kawi ka Party.
Chooh chooh u Hek da ong u wa ym em itæ i yaklam yow pynhaap ya ka sorkar MDA-II, wei pynrap u wa ka BJP toh ka wym bien u yaklam waka TMC lane wa ka Congress, laitnoh du deiwa waroh ki MLA yong kitai ki Party u psiah noh ki cha ka BJP wei lada kamtæ daw lai da kamwi.
