Jowai: Ynne ka sngi ka Joint Action Committee (JAC) da pyntip ko wa da yoh ko ya ka chithi na ka sorkar lyngba u Under Secretary ka chnat Transport wow pyntip wa ya ka yalang kawa da booh wow man mynstep ka 25 tarik da kyrriah noh ya ka cha ka 29 tarik uni u bnai.
Kani ka yalang ha ka 29 tarik u man ko heipor 12:00 i sngi ha Conference Hall ka yung krehkaam Secretariat, Shillong wow yaklam hajrong i dawa ka JAC wow pynkrehkaam yaka hukum ka sorkar heiyatoh wei wow pynthymme yei dor bai kit mar ki truck.
Kani ka yalang toh kawa kynthup ya ka All Jaiñtia Cement And Clinker Transporters Association (AJCCTA), ka Jaiñtia Hills Truck Owners Association (JHTOA) wa ka Meghalaya Truckers Union (MTU).
Da pyntip leh wa ha ka yalang u montri rangbah ka jylla, u Conrad Sangma daw man u kam u chongknor hei emlang u montri ka chnat Transport, u Sniawbhalang Dhar.