U symbood montri rangbah ka jylla da pyntip u ynne wa ka jylla dang man hi ko kawa dang khang ya kiwa na baar jylla wow psiah chapoh ka jylla nadooh kiwa uiñke suwari hadooh kiwa emyatoh, kiwa hayung hasem ki wakreh hapoh ka jylla wei dang pdiang du yaki tre jylla kiwa liwan na kiwi ki jylla.
Da ong u wa ya kiwa lai luti lyngba ka jylla da pynrkhiñ, da pynkhlan chooh chooh yaki kyndon nadooh ki thaw wa psiah ki chapoh ka jylla hadooh wa mih ki deiwa chim yukheiñ thij pa thij wa katwon ngut wa em hapoh kari heipor wa psiah wei heipor wa mih napoh ka jylla yow lait u em kiwa hiar ha chiteiñ luti.
Da pyntip u leh wa da phah ya u Chief Secretary ka jylla wow pynkhlan chooh chooh yaki kyndon haki Entry wa Exit Point yow lait u sepai i kreh chitom ha kini ki bnai wow kdooh u khoom, u khanglaad yei poor ka khlam COVID-19 hapoh ka jylla.
U Prestone da ong u leh wa neidaw waka jylla man ko kawa duna dooh kiwa dang em ya u COVID-19 hapoh ka ri, daw em kiwa kwah wow psiah rieh chapoh ka jylla wei ka sorkar leh chimkhia ko yeini khamtam ha kini ki por wa da jan lait ka jylla na u COVID-19.
Kamtæ da kyntu u ya kiwa em hapoh ka jylla nadooh ki wakreh sorkar, ki wakreh Company wa ym toh wow khut ya kiwa emyatoh hadooh kiwa hayung hasem yong ki wow wan chapoh ka jylla Meghalaya wei kiwa wan daw phah liwan ki pyn na i thaw wow psiah chapoh ka jylla.
