Ka Khasi Students’ Union (KSU) ynne ka sngi da lai booddien ko ya ki mat dawa na ka sorkar hadien i yaklam wa u Montri Rangbah ka jylla u Conrad K Sangma ha u bnai wa dep.
Neiliang u Pynshai Rani, Assistant General Secretary ka KSU CEC hawa klam wa kiwa thoh khubor da ong u wa ka seiñ da wan ko wow booddien ya iyi wa ka seiñ dadep ko u yaklam ha ka 26 tarik u Naisaphra yow tip iyi wa da leh ka sorkar hadooh kattæ.
Da ong u wa heiyatoh wa ka Public Hearing ha Elaka Nongkhlieh, ka sorkar da chna ko ya ka Fact Finding Committee wei da lai chakhmat ya kani ka kaam wei ym chah u emlang u DC, u SP ka East Jaiñtia Hills District, ki dkhot ka Meghalaya State Pollution Control Board khnang wa kani ka Committee u man ko kawa khooid wei kawa lai ryntih.
Heiyatoh wa ka MRSSA, da ong u wa mynstep ka sngi daw em ka yalang heiyatoh wa ka Entry wa Exit Pont ha Umling, wei heiyatoh wa ka Workmen Act 2020, ka sorkar da pyntip ko wa daw em i sikai ya ki sahep kiwa pait ya kani ka chnat mynstep ka sngi khnang wa i pynkrehkaam ya kani ka aiñ daw man ko kawa lai bait lai ryntih.
Heiyatoh won wa i thung kaam thung jaam ha ka Group D, ka sorkar da e ko ha kiwa yahkhmat ka seiñ ya ka Notification wa da pyndooh noh ya ka Personal Interview katwa yong ka Group B wa Group C ka sorkar daw hap ko wow pynbait chwa wei daw pynmih leh ka Notification.
Sa kawi ka mat toh kawa yatoh wa ka NEIGRIHMS heiwa ka seiñ da dawa ko wym pu toh u pynlai chakhmat yei thung kaam thung jaam katwa i yaklam yong ka seiñ wa ka sorkar ym pu man ko kawa biang.
Discussion about this post