Ynne ka sngi hapoh i yahkhmat yong u MDC ka 10-Mynsngat Khanduli Constituency u Dawan Lyngdoh deilang wa kiwa kitkaam yong ka Raij Namdong nadooh u waheh Raij u Elias Susngi, u Secretary Raij Namdong u I. Pakma wa kiwi kiwi da lai ki wow pynkynmoo biang ya u Montri ka chnat pynroi nongkyndong u Hamletson Dohling wow pynkha noh ya ka Namdong C&RD Block kawa da dep pynbna nadooh u snem 2013 wei wot ya i thaw wow chna ya kani ka C&RD Block da dep e sñiawbha da ka chnong Namdong nadooh u snem 2013.
Hajrong ini neiliang u Montri da ong wa ym ye u wow kular chwa hajrong ini tangwa daw booddien u neibynta i emkaam ki paidbah wei ym miat wow kular chwa wei daw pyrchang chwa da ki kaam.
Haka chithi wa da e kti da ong wa yaka Block da kular daka sorkar warim nadooh u snem 2013 wei neiliang ki waheh chnong wa ki heh Raij da dep ki wow e thaw wa heh 18.48 Acre yow booh yaka yung krehkaam ka Block ha Namdong kawa da ya soi soskular lang wa u BDO ka Thadlaskein C&RD Block wei da tyrwa leh da u Deputy Commissioner ka West Jaiñtia Hills.
Da pyntip leh wa hapoh ka Thadlaskein C&RD Block da em 137 tylli ki chnong wa 1,37,939 ngut ki bru katkam ka Census 2011, chooh chooh wa boon ki chnong jngai ki kamwa 100 Km naka yung krehkaam ka Thadlaskein C&RD Block wei na kini ki daw emkaam yaka Block wa thymme ha kani ka thaaiñ.