theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

Da lehkmen ya ka Teachers’ Day ha Jowai

Chiruplang waka ri waroh kawi ynne ka sngi ha West Jaiñtia Hills District leh da lehkmen ya ka sngi kyrpang kiwa sikai namo ka Teachers’ Day ha Yungwalieh ka Tpep Pale, Jowai wa pynlai daka yung krehkaam ka District School Education Officer, Jowai heiwa u Wailadmiki Shylla, MLA ka Jowai da man u kam u kongsan katwa ka D.D. Syngai ADC, West Jaiñtia Hills kam ka symbood kongsan.

Hawa e yei klam yahkhmat, ka A.P. Syiem, DSEO ka West Jaiñtia Hills da e khublei sngi kyrpang ko ya waroh kiwa sikai wa hadien ar snem i chah kdoh chah khoom da yoh biang u lehkmen kamwa jooh.

Advertisement ad1

Ka D.D. Syngai da yaroh ko yei kaam kiwa sikai neibhah wa lyngba yong ki yoh i ya ki bru wa em i bahkhlieh yaka ri ka jaitbru ha ki bynta waphær.

Kyntu ko leh ya kiwa sikai wow paitbha yei rukom man ki khynnah, “Hao han lym toh phi kitæ ki Psychologist ki wow ye u puræ yeiyi wa em hei thij i pyrkhat ki khynnah leh tangwa toh u pyrchang wow sñiawthooh”.

“Weileh ong O yeini neibhah kam kawa pait ya ka District da yoo O boon ki khep wa pynpoi yaki khynnah wow pna chim ki yei mynsien wei wymtip leh yei daw. Katda kamtæ phi kiwa sikai kiwa man kam ki bei ki pa wa ar ki khynnah ye phi wow sikai u pynyoo pynkdaw yaki khynnah heiyatoh ka luti wa bha wow im dei wow yait nei sih wa boon jait,” ong ka D.D. Syngai.

U Wailadmiki Shylla hawa klam kam u kongsan ong u wa wym ye de u ñiaw yei kaam wa bha kiwa sikai haka imlang sahlang, neibhah da chim lut ki ya waroh ki bynta wow sneiñ u pynyoo pynkdaw heiyatoh i bha i miat ki khynnah liang wa nang, khamtam heipor ka khlam COVID-19 wa syndet syndet hap ki wow pynkylla yei rukom e sikai deiwa pynemkaam yei stat Technology. Wei hanla boon i eh wa hap lai luti ki leh wym em u randien ki.

Neitæ hawa pynsñiaw u yaki laad ki luti wada chim ka sorkar heiyatoh u pynku yei puræ puthi ong u, “Hao yoo bait phi wa em i yakhih kiwa sikai, wei kam kiwa mihkhmat leh pyrkhat wei em bait i i sñiaw, tangwa hap phi u sñiawthooh wa kam kiwa mihkhmat wa hap pait yei kreh i khih haki waroh ki chnat krehkaam waphær waphær, ki chnong ki thaw wa kiwi, ka sorkar hap ko u pyrkhat chwa wow leh neibhah wymtoh u kyi hi-eh khlem ye u pynmankaam”.

“Ngait O jan sakhi phi wa hadooh ynne ka sngi kawon kawon ka rai wa kani ka sorkar katni chim ko toh iwa ye ko u pynmankam,” pynrap u Wailadmiki Shylla.

Ha kani ka sngi lehkmen da e leh yaka District Award heiwa na kiwa sikai Secondary da yoh da u Hubert Thyrniang, M.Sc (Physic) Asst. Teacher Govt. Girls’ Higher Secondary School Jowai. Na kiwa sikai Upper Primary da yoh ka Fabriously Suchiang, BA Trained Headmaster Shangpung Govt. UP School. Na kiwa sikai Lower Primary won da yoh u Beyond Lanong, M.A. (Pol Sc) Head Teacher Sohkha Shnong L.P. School.

Neitæ da saam leh yei naam Best District Scout Master wa da yoh u Teilang Rymbai, A/T Achiever Secondary School, Ummulong wa Best Guides Captain wa yoh ka Rosie Bang, R/Leader Thomas Jones Synod College, Jowai

Da pynchongchit chooh chooh ya kani ka sngi dei rwai i chaad naki khynnah skur waphær waphær.

Advertisement ad1
Share this:
Previous

13 ngut kiwa yoh ya ka State Teachers’ Award ka Meghalaya

Next

Super Division: Jop ka Khimusniang ya ka Sabahmuswang