15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Advertisement ad1

Da lehkmen yaka National Youth Day ha Jowai

Advertisement ad1

Jowai: Kamwa ha kylleiñ ki thaw yong ka ri da lehkmen, da kynmoo burom ki yaka National Youth Day ynne ka sngi kawa man leh ka sngikha u Swami Vivekananda uwi na kiwa yahkhmat heiyatoh waka imlang sahlang wei uwa em leh i chaniah haki khynroo khyllood. Kamtæ ha Jowai leh da kynmoo ya kani ka sngi haka yalang wa pynman daka yung krehkaam yong u District Sports Officer, West Jaiñtia Hills District ha Kiang Nangbah Indoor Stadium, Dongmihsngi haka yalang wa pynlai daka Phinda Lyndem.

Ha kani ka sngi da emlang leh ki khon khynroo khyllood wada wan naki thaw waphær waphær waki khynroo khyllood wa puræ ka skur North Liberty Higher Secondary School Jowai. 

Kiwa e yei klam ha kani ka sngi da klam ki hajrong ki phang waphær waphær wa yatoh waki khon khynroo khyllood, wa kynthup nadooh i rukom baam, i pynman yei bor pyrkhat wa chait wa khiah, u yait na ki Drugs wa kiwi kiwi. 

Ka S. Kyndiah wa mihkhmat naka ICDS, da pynche ko hajrong i emkaam i baam khamtam yaki khynroo khyllood kiwa dang em ha i rta wa dang toh u heh u san. Najrong wow baam biangpor, kyntu ko leh wow jied yaki jait baam wa tei. 

Ki bynta wa kongsan wa pynsñiaw ko toh, wym hoi u dam wow bam heipor step, u dih chiboon ka um wei khamtam heipor step toh u dih chwa daka um, ym toh u dih cha ne Coffee dei ja khamtam ki kynthai neibhah ye ko u pynduna snam, wym hoi u baam palat pood, toh u baam yaki jait baam tynre, u baam yaki soh ki jhoor katkam ka samoi yong ki, u kiar naki baam sarok (Junk Food), u pynmyllien u leh Exercise wei pynbiang yei thiah i dem. 

Ka Diana Tongper naka District Mental Health Programme ong ko wa i chait i khiah hei bor pyrkhat toh iwa emkaam tam ha u bru, batai haroh ko yaki kattu katni ki daw wa pynman ya u bru u yoh yei kjut hei bor pyrkhat, wa kynthup leh ki kjtu wa hiar pateiñ, i dih ya kiwa pynmuaid, næ lyngba ki eh wa tyngkhooh hei im wa kiwi kiwi.

Kamtæ khnang yow pyndooh yeini i kjut kyntu ko wa toh u yakhun ya iwon iwon i eh i jynjar wa wan hei im, wei heijooh i por leh toh u tip yei kamram khamtam ki kyntien chwa wow klam, khnang yow ye u yarap ya ki bru wa chem yei eh hei im, iwa ye u ktah yei bor pyrkhat yong ki.

Heiyatoh wow yada nei pynemkaam Drugs iwa da ktah yaka imlang sahlang, ka Lucy Ksoo kawa da mihkhmat naka District Social Welfare waka Scope Foundation Jowai, kyntu ko yaki khon khynroo khyllood kiwa man ka mynried yong ka ri wow chim ki yei bahkhlieh neibhah wa ki leh em ki ka bynta wa khroo u leh heiyatoh u saam wyrta yei sih i Drugs wa kiwi ki jait dih.

Da ong ko wa i yada wa nyngkong dooh hi ym toh hi wot tang u pyrchang leh, deiwa ong bait ym bien yei Drugs, neitæ ki bei ki pa leh toh u chim bynta ki, nalor wa i tip i chemphang toh ka laad wa bha tam yow ye u yait nei Drugs.

Neiliang u District Sport Officer, West Jaiñtia Hills District u Khroo Passah, da pynsñiaw u hajrong i emkaam ka Physical Activities Education neibhah wa yarap ko u wanrah yei chait i khiah hei doh i pran, yarap pynku ko yei rukom im haka imlang sahlang wa kiwi.

Heijooh i por kyntu haroh u yaki khon khynroo khyllood wow chimkhia ki ha ki kaam Sports neibhah wa man ko leh ka laad kamai ha kini ki sngi, nalor wa e ko yei chait hei pran ye ko leh u wanrah yaka mynried wa tyrchaaiñ hei im.

Share this:
Previous

Pynbna ka sorkar Meghalaya ya ki bru wym emkaam wow leh COVID-19 Test heipor wa psiah ki chapoh ka jylla

Next

Da poi i dawai yada COVID-19 ha Meghalaya i wow e chwa cha ki 16,000 ngut