Ka State Project Office, State Education Mission Authority of Meghalaya, Shillong chirup wa ka Meghalaya Bharat Scouts and Guides, Shillong Headquarter ynne da pynman ko ya ka World Literacy Day 2021 ha Auditorium Hall, Meghalaya Bharat Scouts and Guides Headquarter, Shillong heiwa u D P Wahlang, Additional Chief Secretary ka sorkar Meghalaya, Education Department & State Mission Director, SEMAM (SSA) da man u kam u kongsan.
Ka phang yong kani ka sngi toh kawa ong “Literacy for a Human-Centred Recovery-Narrowing the Digital Divide”
U Wahlang hawa e yei klam da khana u ya ka thong yong kani kani ka yalang toh wow pynsñiawthooh yei kordor i stat i tip hei hok manbru longbru. Da ong u leh wa emkaam bha wow wanrah biang ya ki khynnah wa da ieh ya ki skur chiteiñ wow uiñ biang ki cha ki thaw puræ.
Hajrong ka phang yong kani ka sngi da ong u wa ka khlam da ktah bha ko ya i puræ puthi ha ki 2 snem wa da lai wei da chaniah sadu ha i stat ka juk katni wow pynlai bait ya i esikai weiwa ka Meghalaya dang em ko chadien bha heiyatoh wa i stat i tip lyngba kani ka luti.
Da ong u leh wa katkam ka yukheiñ wa da yoh da ka chnat, ha ki thaw sor da em 50-60% ki khynnah Upper Primary Section wei 20-25% ha ki thaw palat sor kiwa yoh ya ka Online Class, katwa kamtæ emkaam bha wow wai noh ya ki thaw puræ hanla em ka khlam neibynta i myntoi ki khynnah.
Chooh chooh da ong u wa ka sorkar India da kubur ko yei duna ha i esikai wa katni wei ka “Foundational Learning and Numeracy”, kawa man ka thong yong ka SSA daw pynjanai ko ya i esikai nadooh dang khian hadooh Class 3, ha waroh kawi ka ri.
Ha kani ka sngi da em leh i batai hajrong ka Free and Compulsory Education hapoh ka Right to Education Act 2009 heiwa u T.T.M Sangma, Special Officer na ka Meghalaya State Legal Services Authority da man u kam u bru chemphang.
Heijooh i por da pynman leh ya i batai hajrong i pyndooh ya ki duma ha ki thaw puræ katkam ka Tobacco Free Educational Institution Programme heiwa ka Dr. Lana L Nongbri, State Nodal Officer Tobacco Cell, Health Department da man ko kam ka bru chemphang.
Da pynkup burom leh da ka Making the Tobacco Free Educational Institution Programme Award cha u Herman Marwein, Block Mission Coordinator, Mylliem Block, East Khasi Hills District, u Victor Nongbet, Joint Director School Education & Literacy, Nongpoh, Ri-Bhoi District. Ka Lucky Nora Tmung, District Community Mobilization, Coordinator,SSA, Ri- Bhoi District. U Srengrang Sangma, District Community Mobilization, Coordinator, SSA, East Garo Hills District. U R. D Shira, District School Education Officer & District Mission Coordinator, SSA, East Garo Hills District wa u Ioanis Umdor, Block Mission Coordinator, SSA, Amlarem, West Jaintia Hills District.
Kiwi kiwa da em ha kani ka sngi toh u A. Ch. Marak, Secretary Education ka sorkar Meghalaya & State Project Director, SESAM (SSA), ka A. Swer, Secretary MBSG, Shillong, wa kiwi kiwi.