Shillong: U montri rangbah ka jylla u Conrad K. Sangma ynne da pynlait u ya ka Mission Jackfruit 2018-2023 ha ka yalang wa khian wa pynman ynne ha Hotel Pinewood, Shillong heiwa da ong u wa kani ka thong toh wow pynmiat yei man u sachram deiwa ye leh wow kyntu kynrong ya ka khayi pateiñ khamtam ha ki thaaiñ nongkyndong.
Da ong u wa uni u soh man u uwa da em chwa hapoh ka jylla wei emkaam wow pynmiat ya oo ha ki rukom baam waphær waphær deiwa pynlut suna ya ka poisa wa i bor.
Hawa pachat yei myntoi wa ye u pynman ya kani ka Mission kawa jop dei yarap ki bru samen, u Conrad da ong u wa emkaam wow krehlang chirup wa ki Hotel wa ki chnong wa pynlai ya kini ki mar wa ki SHG wow pynku yei yoh i kot ki bru cha nongkyndong.
Chooh chooh da ong u wa ka sorkar ye ko wow chna ya ki aiñ wa ki rukom krehkaam, khnang wa ka khayi pateiñ u ku ko tangwa emkaam wow yakrehlang waroh wow man kani ka Mission wa jop.
Heiyatoh wa ka Directorate of Food Processing da kyrmen u wa daw em kam kiwi thong kiwa daw sdang ka sorkar ha ki por wow wan.
U K.N. Kumar, uwa man kam u Agriculture Production Commissioner and Additional Chief Secretary to the Government of Meghalaya, da batai u kajiak chaphang kani ka Mission Jackfruit heiwa da ong u leh wa kani ka Mission daw yarap ko ya ki warep kamjooh leh ka khayi pateiñ ha ki thaaiñ nongkyndong.
Ha kani ka sngi u Conrad da wai u leh ya u ‘Superjack’, i durbula u sachram (Mascot) wow man kam ka Brand Ambassador yong ka Mission Jackfruit ha ki Social Media.
Da e u leh ya ki Certificate of Excellence cha ka Hotel Heiga VNS, Hotel Centre Point wa Little Chef Cafe’, Shillong, ya kiwa da rai wow man kam kiwa jop ha ka Jackfruit Cuisine Tasting wa da pynman ha ka 11 Naisaphra 2018.
Ka Draft Mission Jackfruit da pynlait paidbah ya ka wow pachat yumut ki ha ka 5 Naiynñiaw 2018 heipor wa pynman ya ka Jackfruit Festival ha Shillong heiwa da yoh chiboon ki yumut hajrong kani ka Mission.
Ka Mission Jackfruit toh ka thong krehkaam wa san snem kawa da mang wow wailaad wow yoh khih hadooh 60,580 ngut ki warep, ki bru samen wow seiñkhih, 70 tylli ki SMEs, wow pynkreh hadooh 1180 ngut ki Farmer’s Friends, 200 ATMA, 200 ngut kiwa chet baam napoh jylla.
Chibynta yong i sdang krehkaam kani ka Mission daw pynman boon tylli ki programme da ka Meghalaya Institute of Entrepreneurship i wow kynthup wow esikai ya ki 100 ngut ki warep, 2 tylli ki State Level wa 2 tylli ki Regional Workshop, ki District Level Jackfruit Festival, ki yakob Jack of the Day wa kiwi kiwi.
Hapoh kani ka Mission ka sorkar u pynlut ko T. 67.08 klur ha ki san snem wei na kani T. 40.07 klur u e yarap na ka sorkar pyrdi.
Discussion about this post