Shillong: U Montri Rangbah ka Meghalaya, u Conrad K Sangma da ong u wa ka sorkar jylla man ko kawa paitbniah wei chimkhia ko wow yada na i poor ka khlam COVID-19 neibhah wa smat u wow yabi na uwi cha uwi.
Hawa jubab ya ka phang yatai wa da wanrah da ki MLA ka Congress ha ka yung dorbar ynne ka sngi, u Conrad da pyntip u wa i smat ini i kjut wow yabi næ wow poor man ko hadooh 42% hanla ini i kjut ym pu em ko ha kani ka jylla, neiliang ka sorkar da chim ko ya ki laad ki luti wow yada na ini i kjut. Da pyntip u wa ynnin ka sngi ka chnat i chait i khiah da lum yachem jhan ki wa u montri wa toh u pait ya kani ka kaam heiwa da e yumut wow khang noh chipor chwa yaki thaw puræ ha waroh ka jylla, laitnoh ya kitu kiwa em Exam.
Chooh chooh da pyntip u wa ha katai ka yalang da e yumut leh ya ka sorkar wow khang noh ya kiwon kiwon ki yalang paidbah, ki Cinema Hall, ki yalehke ha ki Stadium wa kiwi kiwi ki thaw wa boon ki paidbah kam chibynta wow yada na utai u khñiang wa da pynkhih ya ka pyrthai.
U Conrad da pyntip u wa nadooh ka 30 tarik u Duiatra (Jan) ka sorkar da chimkhia ko wow paitbniah ya kiwa wan uiñ kiwa na China wa na kiwi ki ri hadien wa mih ini i kjut wei da chem wa ym em ki ya i kjut, deiwa pynrap leh wa ym toh u pynypoor parom kulmar hawa yatoh wa i kjut kawa ye u yahbakla wei pyntieñ ya ki paidbah.
Ha kawi ka liang u Conrad da pyntip u wa ka sorkar da booh ko ya ki thaw kset namo ki Isolation Ward ha waroh ki thaw sumaar kiwa em ha ki District, kiwa kynthup ya 102 tylli ki thaw thiah kiwa ym em yaki Ventilator wa 4 tylli won kiwa emlang yaki Ventilator. Da ong u wa ka sorkar ym em poi pyrkhat ko ya kam ini i jia, hanla man ko kawa jhan neiliang ka sorkar dang yaleh ko wow pynbiang ya ki emkaam waroh wow lait na ini i kjut, deiwa thied leh ya ki tiar wow wa tip kam ki Personal Protecting Equipment (PPE). Da phah leh ya 50,000 tylli ki N-95 Mask katwa ya ki Mask wa em leh le ratap da phah 6 lak tylli, ki Sanitizer 6 lak tylli, Surgical Gloves 20 lak tylli wa ki Thermal Scanner 11 tylli. Da pyntip u leh wa ki Thermal Scanner toh ki wow chim donhi yei chit i doh i pran ki bru, ymtoh kiwa ye u tip wa kiwon wa yoh ya uni u khñiang kjut.
Da pyntip chooh chooh wa ka jylla da yoh ko ya ka NEIGRIHMS kam kawi na ki Testing Centre ha ka thaaiñ mihsngi wei kamjooh da booh ya u Number 108 neibynta wow yarap ya ki paidbah wow thooh yutip hawa yatoh wa ini i kjut wei kamjooh kiwi ki laad wow phah syndong ya ki paidbah.
Chaw ya ini, neiliang ka MLA ka Congress na Ampati ka Miyani D. Shira wa u MLA na Umroi, u George Lyngdoh da wanrah ki ya ka Adjournment Motion ha ka dorbar mang tyngka heiwa da chimbynta lang leh da kiwi ki MLA wa kynthup ya u Dr. Mukul Sangma, u Himalaya Shangpliang, ka M Ampareen Lyngdoh, u Meralborne Syiem, u Adelbert Nongrum wa u Dr. Azad Zaman. Waroh kini ki MLA da pynsñiaw ki yei sñiawkhia hawa yatoh wa i maa nei smat poor uni u khñiang kjut.
Chooh chooh ha kani ka dorbar, ynne ka sngi u Lamphang, u Metbah Lyngdoh hadien wa da yasyllok wa ki MLA, ka Business Advisory Board; da pynbna wa da pyntbian noh ya kani ka dorbar kam kawi na ki luti wow yada na i lum paidbah, wei ya ka dorbar mang tyngka daw pynman noh du ha ka 19 tarik uni u bnai.
Discussion about this post