U Symbood Montri Rangbah ka jylla, u Prestone Tynsong uwa man leh kam u Montri ka chnat Bordiñ da pyntip u wa da phah ya waroh ki karkhana wow su noh ki ya waroh ka bai bordiñ ki kiwa dang sah lym kamtæ daw chah ah noh ka bordiñ ki.
Da ong u wa ka MeECL da yaleh ko katwa ye yow yoh smat ya ka bai bordiñ wa dang sah na ki karkhana kamjooh ki manyung wei da pynkhreh leh kammon wow leh yeini.
Heiyatoh wa ka RTI wa da ong wa em palat 58 tylli ki karkhana ha Umiam wa Byrnihat ki wym em su ya ka bai bordiñ kawa dapoi T. 44 klur, neiliang u Tynsong da ong u wa ki wym su daw hap ki leh wow su ya ka kuna.
Da ong u leh wa ym maap ya kani ka bai bordiñ wa dang sah.
Da khana u leh ini wadep da wanrah ya ka One Time Settlement Scheme ha u 2018-19 wei ini toh du wow maap ya ka kuna ym toh ya ka bai bordiñ.
U Prestone da khana u leh wa da em ki karkhana kiwa da chah bordiñ ki wym bood ya ka hukum wei da dep phah leh ki Notice cha ki karkhana yow su noh.
