Shillong: Hadien wa mih khubor wa em i pyrchah wa i dawa yong ki Montri wa em ha ka sorkar Meghalaya Democratic Alliance (MDA) na u Montri Rangbah ka jylla u Conrad Kongkal Sangma wow leh u iyi iyi deiwa smat hei wow kdoh u khoom yei joor biang ki kaam khayi pyrchah yaka aiñ ya u mooyong ha jylla. U Prestone Tynsong uwa man leh uwa yahkhmat ka NPP wa u Symbood Myntri Rangbah ka jylla, ynne ka sngi da ong u wa ini toh lyngba i yaklam kawa jooh em man-i-por yow pynsñiaw ya ki phang wa ki Montri sñiawkhia ki.
Hawa klam wa ki laad pathai khubor ynne ka sngi, da ong u wa ka sorkar MDA waroh kawi pyrchah ko ya i khayi pyrchah yaka aiñ ya u mooyong, heiwa da kyntait u leh wa em i chalan pyrchah yaka aiñ ya u mooyong deiwa ong wa i mih ha ki laad pathai khubor toh du i pynbaad, wei ka sorkar da phah ko yaki sahep yong ka ha ki District nadooh ki Superintendent of Police wa ki Deputy Commissioner wow paitbniah bha ya em i chalan pyrchah yaka aiñ ya u mooyong neibhah daw ktah ya ka muna poisa yong ka sorkar.
Da ong wa i kaamram yong ka sorkar toh wow pyntikna wa ym em ki leh pyrchah aiñ, khamtam hadien wa da khang da ka National Green Tribunal (NGT) wow chalan ya u mooyong na ka jylla. Da ong u wa i pynlai wa katni ya ki Truck kit mooyong toh du ya kitu kiwa yoh ksoh nachwa wei katni da lai deilang wa ki kot ki sla kiwa biang.
Ha iwi i liang da ong u wa i khayi mooyong hapoh ka jylla u man ko katkam ka hukum wa da pynmih da ka Supreme Court, heiwa da pyntip u wa i mantre ya ki thaw, wa ki aiñ ka sorkar pyrdi leh ym ye ki wow knieh yei hok, katwa hawa yatoh wow tih mooyong, da ong u wa ka Supreme Court ka ri da e laad ko wow khayi ya u mooyong napoh ka jylla, tangwa deiwa bood yaki kyndon yong ka Mines And Minerals (Development And Regulation) Act wei kamjooh wow yada na i ktah yaka rymaw. Da ong chooh chooh u wa neiliang ka sorkar da pynchlur ko ya kiwa khayi mooyong wow lai katkam ka kyndon yong ka MMDR Act, kitæ wow chna chwa ya ka Mining Plan wei wow yoh yaka Mining Lease neibynta wow yoh bor wow sdang tih ya u mooyong.
