U Symbood Montri Rangbah ka jylla, u Prestone Tynsong da ong u wa ka sorkar da ekti ko ha ki pulit wow takit yeiwa sakhiat hajrong i mih kawi ka seiñ wa pyntieñ ha ki kajiak sngi wa dadep deiwa pynrap ki pulit katni da leh ki yei kaamram yong ki.
Da ong u wa ka sorkar da phah thooh ko yei maham yong kani ka seiñ wa da phah lyngba ki laad pathai khubor wa lada toh iwa sakhiat wei ki pulit dang leh ki yei kaamram yong ki.
Kam wow kdaw heini kawi ka seiñ wa da kam toh da i pyrtuid ‘Lawei ba Phyrnai’ da phah email ko cha u Montri Rangbah ka jylla ha ka 1 tarik, ha ka 7 tarik waka 11 tarik uni u bnai, wei ya kini ki email da phah leh cha kiwa pathai khubor, kani ka seiñ da kam ko wa em ko kamwa 37 ngut ki dkhot wei da maham ko leh wow tympdung bomb nadooh ka 1 Naisan.
Hawa kylli, lada i mih sa kani ka seiñ daw man i kam u moo-chynthut ya i klam yasuk hapyrdi ka sorkar wa ka HNLC, neiliang u Prestone da ong u wa ym ye wow man wa i mih kani ka seiñ daw pynthut ko ya i klam yasuk wa ka HNLC.
Da pynrap u deiwa ong leh wa ka sorkar wa ka HNLC kwah ki wow em bait i klam yasuk i wow sdang noh wut-wut.
