Da phah ya kiwa mylla wa wan na baar jylla neibynta ka Durga Puja wow pynbiang ya ki kot ki sla

Ki bor District ka East Khasi Hills District da phah ki ya waroh ki Durga Puja Committees (DPC) yow phah yei pyrtuid ki bru wa wan kreh mylla neibynta wow chna Pnadal wa kiwi de ki kaam wa yatoh waka Durga Puja deiwa phah wow rah lang kini ki bru ya ki Voter ID næ Aadhaar Card wei yeini toh u leh ha kani ka tayaaw.

Ya kani ka rai da chim hadien wa yachem ki dkhot ka Central Puja Committee (CPC) waka DC ka East Khasi Hills, ka RM Kurbah.

Ini ym em mut ko ya kitu kiwa chong chonng ka jylla, kiwa khih mylla wa kiwa leh niam.

Heiyatoh won wa i dang krehkaam ka Section 144 CrPC ha ki thaaiñ ka Secretariat nadooh na State Central Library chadooh ka thaw sah u Chief Secretary, da pynche wa ini ym ktah ko ya ka sngi lai noh Blai heiwa daw chah leh ya ki kattu katni ki heh ki CPC/DPC kamjooh kiwa ksoh kaam wa kiwa leh niam wow lai ki dei kjat yow synraan ya ki kari wa kit Blai ha kini ki bynta wa krehkaam ka Section 144.

Related posts

Kwah u George wow psiah biang cha ka Congress yow yakhun MDC

December 23, 2024

Pynbna ka NPP sa 6 ngut ki kyrtong MDC cha ka JHADC

December 23, 2024

Da phah leh ya ki Durga Puja Committee (DPC) wow pynche ki ya jar jiar ki dkhot heiyatoh wa ini wow bood ya ka kyndon ha ka 24 tarik kawa man leh ka sngi lai noh Blai.

Hadien wa da kyrpaad ka CPC, neiliang ka Deputy Commissioner da kular ko wow pynmih da kawi ka hukum neibynta ki Nepali DPC yow ye ki wow leh ya ka Phoolpati Yatra haka 21 tarik waka Maha Kalratri Puja hei pyrdi synyaaw ka 22 tarik. Yei por wow pynman ya ka Phoolpati Yatra ha ka 21 tarik daw pynbait won ha ka yalang yong kini.

Da kyrpaad leh ya ka DC wow pynsmat yei e bor ya ki DPC naka PWD yow sdang noh ki wow booh ya ki khilon wei wow chna ya ki Pandal heiwa da kular wow e bor noh ha ka tayaaw wow wan.

Ha kani ka yalang, ka DC da ong ko wym toh wow chah ya ki bru samen næ ki Committee dong wow lai noh Blai ki ha kiwon kiwon ki wah wa em ha Shillong wei kiwa leh pyrchah daw chah pynchitom ki.

Kamtæ ka CPC da phah ko ya ki Zonal Coordinators wa ki Puja Committees wa em ha Shillong yow lai pyntip yeini cha waroh ki bru samen wei wow lai booh ya ki Blai ha ki thaw wa da booh da ka CPC iwa em hajan ka madan Polo, Shillong wei wow phah leh ya kitu kiwa kreh wa wan na baar jylla wow rah ki ya ka EPIC/Aadhaar.