15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Da pyllait ko ya ka kot “Ka Kur Susngi”

0 Comments
Advertisement ad1
Advertisement ad1
Advertisement ad1

Jowai : Ka seiñ Susngi ynne ka sngi da pyllait ko ya ka kot “Ka Kur Susngi” wa thoh da u Seriallyone Susngi ha ka yalang wa pynman ha ka chnong Nangbah, West Jaiñtia Hills.

Uwa thoh ya kani ka kot da ong u wa da chim por ya oo da boon snem yow thooh tre katwa ye u ya ki parom wa da hiar pateiñ hei yatoh wa neiwon mih ka kur Susngi wei da chem u wa ka Beipun wa nygkong dooh kani ka kur toh kawa na ka chnong Nangbah.

Na ka Beipun Susngi da mih hadooh 11 kpoh wa kynthup ya ka Sniehblang, ka Throp, ka Skiah, ka Phen, ka Tharuh, ka Rwet, ka Sidiaw, ka Khynriam, ka Padit, ka Shato wa ka Jungai.

Kiwa klam ha kani ka yalang kam u E. Susngi da ong u wa emkaam ya tipmit chi kur yow lait ka yachong kurim chi kur.

U R. Susngi, General Secretary ka Seng Kur Susngi, Khasi Hills da ong u wa ki pyrtuid ki bei wa katni da em ka pynman kur toh iwa bakla neibhah em du kawi donhi ka kur Susngi.

U O. Pasi Asst. IGP, kam u Kongsan ha kani ka sngi da yaroh yei kreh chitom kiwa emkti ha kani kot yow thooh tre ya ka kur Susngi wei kani ka kot leh man ko kawa kordor bha neibhah nachwa ki parom toh iwa hiar pateiñ da ki parom wei lada ym em wa thoh ya ki ki daw wiar daw mylliñ noh ya ki.

I Parom wa tbian chaphang ka kur Susngi

Ha ki por warim da ong wa da em u bru wa man broo ha uwi u bru ha ka chnong Nangbah wei uni u bru da kreh chitom u nei step hawa miet hadooh wym yoh por de u tang sum u sait hadooh wa da sap ya oo da ki ksi wa yinreiñ.

Ka kurim yong oo da kyntu ko yow chongsngi u chi sngi yow yoh laad u, u sum kamjooh leh yow yohlaad ko u sait ya ki sula yong oo.

Tangwa u tre yong oo ym jooh chah u wow pep kreh u chi sngi leh, kamtæ ka kurim uni u broo da kular ko wow lai krehlang wa oo ha ka sngi wa bood yow su kylliang ya ka sngi wa dam kreh u.

I kreh wa haap kreh ymtoh iwa suk wa toh ki kaam chynrang tangwa dei maya ya u kurim da rangip ko ngiaw næ wei da kreh ko yei kaam u kurim ha kiwon kiwon ki sngi wa da pep kreh u.

Kamtæ u tre da sdang u wow khut pyrtuid ya ka kam ka Su-sngi wei da man ko ka Bei wa nyngkong namo ka seiñjait ka kur Susngi.

Hadien kattu katni snem u kurim ka Susngi da khlaad u na ka pyrthai wei da ieh u ya ki ar ngut ki khon kynthai; ka Khi-iaw wa nyngkong wa ka Dhon ka khon wa ar.

I khlaad u pa na kani ka manyung da wanrah ko yei dooh i duk wa khroo hadooh wa ki khon kynthai ym jooh mih ki cha lait neidaw wa ym em sula ki u sap.

I yung wa sah toh i yung phlang wa da yabhah le kamra ka kyndur wa man kam ka kamra chet ja, ka kamra thiah wa ka kamra kyndep wa booh ya ki tiar ki tar.

Ha kawi ka sngi da wan uwi u dkhar dai that wei da thooh thaw sah miet u tangwa ym em wa chah oo. Khaddooh da poi u ha i yung ka Susngi wei da kyrpaad u ya ka wow chah ko u sah miet ha yung yong ka. Nyngkong ym chah ko tangwa hadien da chah ko u sah u manda kular u wa oo u mih u dang step yow li dai that u wei u wan thiah u heipor miet. Dei mynsien wa sñiaw wyrai da chah ko u sah u.

Kamtæ da thiah u ha kamra chet ja yong ka Susngi wei yei pyrtuid uni u da dkhar da tip kam u Kunnai Samai.

Heipor wa baam ja ki i miet ka Susngi jooh khat ko ha ki le tylli ki sla wei da rah ko ya kawi ka sla cha kamra booh tiar, u Kunnai hadien wa yoo u yeini da kylli u yei yi itu i ja? Ka Susngi da jubab ko wa toh ya ki khon miaw wa em kamwa 3-4 tylli katwa u Kunnai won da sñiaw phylla u wa khlan kitæ ki miaw u baam ja.

Ini da pteiñ i boon sngi wei khaddooh da kylli u na ka Susngi yow khana ko yei hok wei da phla wa em ko arngut ki khon khyllood tangwa neidaw wa joor i dooh i duk ym yoh sula ki u sap yow mih cha lait.

U Kunnai da e u ya ar tylli ki sula cha ka Susngi yow pynsap ko ya ki khon yong ka yow yoh ki u chong baamja lang.

Ha ka miet wa bood u Kunnai da yoh u yoo ya ki dur kini ki ar ngut wei da chong baamja lang ki waroh soo ngut wei da man ka miet wa kmen dooh yong kani ka yung. Kamtæ da lai ki por wei ka yung ka sem da phooh da phieñ ko wei ka Susngi da kwah ko u su kylliang ya u Kunnai deiwa tyrwa ya oo wa ye u jied ya ka wi ka khon yong ka kam ka kurim yong oo.

U Kunnai da jied u da ka Dhon ka khon khian neidaw wa man ko kawa jemnood.

Ka khon waheh won ka Khi-iaw da yoh kurim ko cha ki thaiñ war wa lai khayi ko wei da kylla kur ko cha Jungai iwa da sin ki War ka iwa mut ka Sngi hei kteiñ War.

Share this:
Previous

Da khang hadooh 11 tylli ki skur ha EJH nadooh wa khang tih mooyong : EJNC

Next

Chah kem u suba chna suloi na Kudeng Rim