Ka sorkar jylla ynne ka sngi da pynbna ko ya ka Election MDC cha ka Garo Hills Autonomous District Council kawa daw pynman ha ka 09-04-2021, katwa i niaw Vote u man ko ha ka 14 tarik u jooh u bnai.
U Prestone Tynsong da pyntip u wa ya ka Draft Electoral Roll daw pynmih ha ka 04-02-21, wei i thap pyrtuid u man ko hadooh ka 15-03-21.
Kam wow pynkynmoo wa ka samoi krehkaam ki MDC ha GHADC da kut ko ha ka 18-10-20, tangwa neidaw wa em ka khlam COVID-19, ya ka Election da pynslem noh u pynman wei neiliang ka sorkar da rai ko wow booh da ka synchaar Administrator hadooh wa da ye u pynman biang ya ka Election.
I pynlut neibynta wow pynman ya ka Election u man bait na ka GHADC, tangwa kamwa man katni, ka Council em ko hei stang poisa. Hawa kylli, u Prestone da pyntip u wa neibynta ka Election, i pynlut daw bah daka sorkar jylla T.15 klur, tangwa ya kani ka poisa daw kheiñ lane daw ah won ha i por wa ka sorkar su ko yei bhah ki dan wa ka Council toh u yoh ko.
