Ka Rajya Sabha ynne ka sngi da da mynjur ko yaka ‘The Essential Commodities (Amendment) Bill 2020’ deiwa booh yaki kyndon wow pyndam noh ya ki mar kam ki Cereals (kam u khoo), Pulses (kam u dai), Oilseeds (ki jhoor wa pynmih phniang), Edible Oils (phniang baam), u piat wa u salah yow dam noh ki wow em hapoh ka Essential Commodities namo ki mar wa emkaam.
Ya kani ka Bill da wanrah da u Minister of State for Consumer Affairs, Food & Public Distribution, u Danve Raosaheb Dadarao ha ka Lok Sabha haka 14 tarik uni u bnai yow pyndam yaki Ordinance kiwa da pynkrehkaam haka 05-06-2020. Ya kani ka Bill da mynjur daka Lok Sabha haka 15 tarik uni u bnai.
Kani ka Essential Commodities (Amendment) Bill 2020 toh kawa thmu wow pynwiar yei tieñ yei khuslai kiwa kwah wow embynta ha i pynlai yaw ya kini mar neidaw wa joor tuklar ka sorkar heiyatoh waka khayi pateiñ. Kamtæ deiwa yoh yei laitlooid wow pynmih, u pynlai; daw pynchlur ko leh yaki bru samen wow pynlut poisa ki nadooh kiwa na baar ri wow chna yaki Cold Storage kamjooh wow pynthymme yei rukom chalan ya kini ki mar.
Ka sorkar hanla da pynlaitlooid ko yei rukom khayi, da booh ko leh ya ki kyndon wa wow yada ya kiwa pynemkaam ya kini ki mar; wa lada em ka thma, ki khlam, i ku dor wa cha palat, ya kini ki mar rep daw ye hi ka sorkar wow pynbiat.
Hawa e yei jubab hapoh ka Rajya Sabha ynne ka sngi, u Minister of States for Consumer Affairs, Food & Public Distribution u Danve Raosaheb Dadarao da ong u wa ini i pynkylla ya kani ka aiñ da leh yow lait u sepai ki mar rep neidaw wym biang ki thaw booh yaki. Wei ini daw man ko i myntoi ya waroh nadooh ki warep, kiwa thied wa kiwa da pynlut poisa ha kani ka khih.
Ka sorkar da ong ko leh wa ka India toh kawa ye u pynmih pahooh yaki mar rep tangwa na i daw wym ye dor da iwa biang, wei wym biang ki thaw booh yaki mar rep kam ki Cold Storage, Warehouse kamjooh hei wow chalan cha baar ri, da pyndooh mynsien ko ya kiwa khayi neidaw wa em ka Essential Commodities Act. Kamtæ ki warep da dooh nong ki cha palat heiyatoh waki mar wa daw pyut. Kamtæ ka sorkar da ban joor ko wa deiwa pynkylla ya ini daw pynchlur ko yaki bru samen wow chna ki yaki Cold Storage wei kamjooh wow pynthymme ya i rukom pynlai wei khayi ya kini ki mar yow yoh yei dor wa biang.
