U Prime Minister ka ri u Narendra Modi ynne ka sngi da pynman u yaka yalang ‘High-Level Meeting’ yow pyrkhat yei pynman ya ki Exam ha kiwi boon ki kyrdan khamtam heiyatoh wa i long i man ka khlam COVID-19. Da emlang leh u Union Education Minister, u Ramesh Pokhriyal Nishank, Principal Secretary u Prime Minister, u Cabinet Secretary, ki School and Higher Education Secretary wa kiwi de ki heh sorkar.
U Prime Minister da ban joor u yei emkaam wow pyrkhat ya ki khynnah skur iwa toh u booh hakhmat dooh da ka sorkar. Da ong u leh wa ka sorkar u pyrkhat ko yeiwa bha dooh dei wym ktah yei chait i khiah kamjooh leh yaka puræ puthi.
Da pait leh yeiwa pynman Class X wa Class XII Exam kiwa daw sdang ha u bnai wow wan. Ya ki Board Exam ka Class X wa XII wa pynman da ka CBSE toh kiwa da booh wow sdang nadooh 04-05-21. Ka khlam hapoh ka ri katni toh kawa da ku biang ha kiwa boon ki jylla heiwa da em ki jylla kiwa chah ktah palat ya kiwi ki jylla, heiwa ha kini ki jylla wa em 11 tylli da hap khang ya ki skur.
Ka CBSE phær ko na ki State Board, ka CBSE toh kawa pynman hapoh waroh kawi ka ri wei da emkaam wow pynman ya ka heijooh i por. Kamtæ deiwa pait yeiwa man katni kamjooh wa da em ki skur kiwa da hap wow khang, da chim ya kini ki rai ha wah:
- Ki Board Exam neibynta ki Class XII kiwa da pynbait wow pynman nadooh ka May 4th hadooh June, 14th, 2021 da pyndam chwa chipor. Daw chong pyrkhat biang ya ini i kaam ha ka 1st June 2021 da ka Board, wei daw pyntip 15 sngi chwa wow sdang ki Exam.
- Ki Board Exam neibynta ki Class X kiwa da booh wow pynman nadooh ka 4thMay hadooh June 14th, 2021 toh kiwa da pyndam. Yaka Result ka Class X Board Exam daw pynkhreh hajrong ki kyndon wa daw chna da ka Board. Kiwon kiwon kiwa ym hun ya ki Marks wa yoh ki ye ki wow chong yaleh da ka Exam manda man chngaaiñ wow pynman ya ki Exam.