Da pyndam yei thmu Dam yaka Umngot, daw sdang yei e markylliang yei bordiñ: Prestone

U Montri wa pait ya ka chnat Bordiñ ha ka jylla, u Prestone Tynsong da pyntip u wa ka chnat daw pynkrehkaam ko ya ka ‘Power Swapping’ wow yada nei dooh bordiñ namo ka Load Shedding khamtam ha ini i por tlang.

Da ong u wa ka Load Shedding da jooh jia bha ha ki bnai tlang wa duna um, tangwa katni da wanrah ya i rukom krehkaam thymme deiwa ya e mar kylliang yei bordiñ, “Ha i por wa pahooh i bordiñ ha ka jylla daw dai i, wei hawa duna daw chim biang yow pynthikna wa ym em ka Load Shedding,” da ong u.

Da ong u wa neiliang ka Meghalaya Energy Corporation Limited da thooh ya ki laad wow pynlait ya ka jylla nei chah pyndooh bordiñ ha ki bnai wow wan kiwa man ki bnai wa duna um.

Ha iwi i liang u Prestone da pyntip u leh wa ka sorkar da booh thong ko wow pynkrehkaam noh ya ka Ganol Small Hydro Project (GSHP) ha u Naikhynde yong u snem 2022.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

“Nga kwah O wow pyntip wa i pynkrehkaam ya ka GSHP kawa man kawi na ki kreh wa emkaam da booh wa la kammon kammon daw sdang ha u Naikhynde 2022,” da ong u.

Ka Ganol Small Hydro Project da pynkhreh neibynta wow pynmih ya ka bordiñ kawa man 22.5 MW kawa da mang T. 350 klur ha u snem 2006, tangwa yei dor da pynthymme biang ha u snem wa da dep cha ka T. 507.71 klur.

Hawa yatoh wa i Dam ya ka wah Umngot neibynta ka Umngot Hydro Project, u Prestone uwa man leh u Symbood Montri Rangbah da ong u wa da dep wow kular ya ka Joint Action Committee wa ka sorkar wa ym lai chakhmat ya katai ka kaam.

“Ym lai chaphrang ya ini neibhah wa em boon kiyi kiyi, khamtam hadien wa da mih i pyrchah na ki tre thaw kawa da ye leh wow ktah ya i kaam uiñke suwari yong ka thaaiñ, neiliang ka chnat i da pyndam noh yei thmu yong ka Umngot Hydro Project,” da ong u.

U Prestone da ong chooh chooh u leh wa ha ka yalang wa ki sahep ka chnat Bordiñ kawa da man ha ka sngi wa ar, da rai wow sdang pynkreh noh ya ka Mawlai Sub Station. Da pyntip u leh wa ya ka Tender wa da pynmih ha u snem 2019 da dep wow pyndam noh wei katni daw khut biang ya ka Tender wa thymme wei da pyntip leh wa i kyrchaan poisa neibynta katai ka Project toh na ka chnat DONER yong ka sorkar India.