Da pyndep ya ka lehniam e ngooh ya ka Blai Synhen ha Thadlaskeiñ

Jowai: Ka Seiñ Raij Mukhla da pynman ko ya ka lehniam e ngooh e dem ya ka ‘Blai Synhen’ ha ka nan Thadlaskeiñ ynne ka sngi, ha kani ka lehniam da e ngooh da ki khon ki hajar ka Seiñ Raij Mukhla kiwa da kær ya ki da kani ka Blai kawa chong wa hapoh kani ka Pung Niam næ Thwai Niam kawa man leh kawa jooh lehniam Chaad Pastieh wa ka Knia Pam Blang tangwa ynne ka sngi da pynman ya ka leh niam kawa man leh kam i pynkhreh neibynta ka lehniam kawa heh.

Ynne ka sngi ha i yahkhmat u Langdoh Niam ka Raij Mukhla wei hei emlang ki montri yong oo kiwa khut ki waheh Sankur hei sakhi lang ki khon khynroo khyllood ka Seiñ Raij Mukhla, da mih ki wow pyndep ya ka lehniam e ngooh hapoh ka Duwan Knia ka Syiem Blai.

Kamtæ hadien wa da dep wow pynman ya ka lehniam e ngooh, ki khon ki hajar ka Seiñ Raij Mukhla hapoh i yahkhmat u Pa Langdoh Niam da pynman ya ka pynkhooid yaka soodong ya ki jakhlia kiwa em ha kani ka nan wa kyntang.