Jowai: Ka 1st Inter Grassroots Boys/Girls Football Tournament-2019 kawa pynman da ka yung krehkaam u District Sports Officer, West Jaiñtia Hills District neibynta ki khynnah chynrang wa kynthai kiwa em 9-12 snem i rta wa kiwa em 7-9 snem i rta da sdang ya ka ynne ka sngi wei da pynkut leh pyn ynne ka sngi ha madan Kiang Nangbah Stadium, Ladthadlaboh, Jowai.
Ki dhab (Team) wa chimbynta da yabhah ya ki kam ka Jowai Centre, Amlarem Centre, Ummulong Centre, Bakur Centre, Wahiajer Centre wa Laskein Centre.
Haka kyrdan ki chynrang 9-12 snem i rta da yaleh mar 11 ngut chilliang wei i por da pynman mar 15 minit chi kylla katwa ya ki kynthai da pynman mar 7 ngut chilliang wa i por toh 10 minit chi kylla.
Haka kyrdan ki chynrang 7-9 snem i rta da yaleh mar 6 ngut chilliang wei i por won toh 10 minit chi kylla kamjooh leh ya ki kynthai.
Ha ka yalehke Final ki kynthai haka kyrdan 7-9 snem i rta, ka Jowai Centre da jop ko yaka Wahiajer Centre da 1-0.
Haka Final ki chynrang wa em 7-9 snem i rta ka Wahiajer Centre da pynrem ko ya ka Jowai Centre da 1-0.
Haka yakhun Final ki kynthai wa em 9-12 snem i rta, ka Laskein Centre da jop ko yaka Wahiajer Centre da 2-1 lyngba ka yachut Tie-breaker.
Haka yalehke Final ki chynrang wa em 9-12 snem i rta, ka Amlarem Centre da pynrem ko yaka Laskein Centre da 4-3 lyngba ka yachut Tie-breaker.
Ha kani ka sngi, u Richard Uriah Principal ka North Liberty HS School Jowai da man u kam u kongsan wei da emlang leh u Rancha Lyngdoh, Secretary Laskein Block, u Kmen Shylla u waheh chnong ka Wahiajer wa u DSO ka WJH u H. Shangpliang.
Discussion about this post