Ka Behdieñkhlam ka Raij Jowai u sdang ko nadooh ka 6 tarik uni u bnai wei daw pynkut ha ka 9 tarik, kamtæ kam chibynta yong kani ka lehniam, ynne ka Khyllaw ka 5 tarik da pynkhooid ya ki yaaw hapoh i pait u Dolloi, u Langdoh, u Pator, ki Wasan wa kiwi.
Ki thaw ha yaaw wa da pynkhooid toh ka Madan Datlakawor, ka Pohsawiar, ka Madan Chaad Sukra, ka Madan Kñia Khad, Madan Pynchongngiah Dieñkhlam, ka madan pynchong ya ka Symbood Khnong, ka Madan Siat-Thong wa kiwi.
Hawa yaklam wa u Dolloi ka Elaka uwa man u khlieh ka niam, u Puramon Kynjing da ong u wa i pynkhooid ya ka yaaw wa man leh ki thaw niam toh wow pynkyntang ya ki hadien chi snem wa e laad ya ki paidbah wow chong khih chong khan ki næ wow pynemkaam ya ki hei emkaam wa man-ka-sngi.
Da ong u wa ha ki soo sngi le yaaw won kiwa man ki sngi ka tayaaw Behdieñkhlam da pynkyrpang ya kini ki thaw neidaw wa daw lehniam ha ki.
Chooh chooh da kyntu u ya ki paidbah wa hadien wa da pynkhooid wow e ki yei krehlang ya kiwa lai wa wan kamjooh kiwa booh kari ha kini ki thaw wow neh i thaw wa khooid kat hadooh wa pyndep ya ka lehniam.
Heijooh i por da ong u wa ki bru dang emkaam bha ki yei hikai neibhah hawa pynkhooid ya ki thaw da chem ya ki Plastic, kamjooh i jakhlia iwa ktah ya kiwa pynkhooid ya kini ki thaw.
Discussion about this post