Ka Meghalaya da pynkhreh ko wow pdiang ya ka G20 Space Economy Leaders Meeting (SELM). Hawa pynbna yeini, u Principal Secretary, Home Department ka sorkar Meghalaya, u Dr. Shakil P Ahmed da khana u wa kani ka yalang toh yow pynyoo yei stat ka India heiyatoh wa ki kaam haw-haw (Space Activities) kamjooh i mahajon ka Meghalaya ha ka riti dustur.
Ya ka yalang wai u pynman ha ka 17 tarik ha Hotel Courtyard Marriott, Shillong. “Najrong ka Indian Space Research Organisation (ISRO), daw em leh kiwi kiwa khih wa khan ha ki kaam wa yatoh waka haw-haw (Space Economy Sector) kiwa daw pynyoo ya ki buit yong ki. Daw pynyoo leh chiboon kiwa yatoh waka dustur riti wa kiwi de,” da ong u Dr. Shakil deiwa pynrap wa kani ka yalang daw man ko leh ka rynsan yow pynyoo cha ka pyrthai ya ka Meghalaya kam kawi na ki thaw uiñke suwari wa bha tam kamjooh yow wan pynemkaam kiwa na baar ya ka poisa ki yow pynku ya kani ka kaam. Daw em kamwa 28 tylli ki Startup kiwa em ha ka Space Economy Sector kiwa daw wan u chimbynta.
Kani ka yalang toh kawa da pteiñ ya kiwi ki G20 Summit kiwa da dep pynman ha Saudi Arab, Italy wa Indonesia yow ya krehlang hawa yatoh wa ka Space Sector.
U Director ka ISRO, u Dr. Sudheer Kumar da ong u wa ka ISRO daw pynyoo ko ya waroh i stat yong ka deiwa pynrap wa ki jylla ka North East em ki i bynta wa emkaam bha neidaw wa em ko ki loom wa i rukom man ka suiñ bneiñ iwa pynman kam i thaw wa biang bha wow pyrchang yei stat namo ka Space Application.
Da ong u leh wa ka Northeast Space Application Centre toh kawa da krehkaam bha wei ki leh daw pynyoo ki ya ki kaam wa da leh ki yow bien kiwi wow leh u sdang yei kaam yong ki ha kani ka thaaiñ. Da pyntip leh ya kani ka Summit daw pynman ha Bengaluru ha ka 6 wa ka 7 tarik u Naiynñiaw kawa man kawa heh dooh wei kani kawa ha Shillong man ko kam wow sdang donhi.
U Director ka ISRO da ong u leh wa ka Space Technology toh kawa biang dooh yow pyntip deiwa tikna yei slap, i rang, i joor lær wa kiwi de.
Ha ka 17 tarik daw wan wai ya kani ka Summit da u Montri Rangbah ka jylla, u Conrad K Sangma deilang wa u Montri Khynnah ka sorkar pyrdi wa pait ya ka chnat Finance, u Pankaj Chaudhury, u Montri Khynnah ka sorkar pyrdi wa pait ya ka chnat Science & Tech, u Dr. Jitendra Singh, u Amitabh Kant, G20 Sherpa, Secretary, na Department of Space (DOS), u Somanath S wa u Chairman IN-SPACe, u Dr. Pawan Kumar Goenka.
