Ka chnat Arts and Culture ka sorkar jylla da khreh ko u pynyieñ ko ya u mot wa chirynyieñ yong u Woh Kiang Nangbah uwa man u khlawait wa yakhun thma pyrchah yei synchaar embor ki pharæng.
Ya u mot wa chirynyeiñ u Woh Kiang Nangbah u pynyieñ ha i thaw yong ka chnat Transport kawa em mar pyrchah ka laad Kiang Nangbah Govt College Jowai.
Yow pynsmat yei kaam, neiliang u Montri ka chnat Arts and Culture, u Sanbor Shullai chirup wa u Montri i chait i khiah kamjooh ka chnat Sport uwa man leh u MLA ka Jowai, u Wailadmiki Shylla ynne ka sngi da hiar lai pait lai sylli ki ya i thaw wow pynyieñ ya u mot.
Ha ini i hiar lai pait sylli da synraanlang leh ki Engineer, ki sahep na ka chnat Tourism, kiwa yahkhmat chnong ka Mihmyntdu, ki dkhot ka Synjuk Ki Waheh Chnong Jowai wa kiwa yahkhmat ka Jaiñtia Students’ Union (JSU).
U Sanbor Shullai pyntip u wa ka chnat da pynkhreh ko wow pan thaw 10,000 sq ft na ka chnat Transport hajrong ini i thmu pynyieñ ya u mot u Kiang Nangbah wei yow chna leh ka kynja Park chongke pyngngaad ka wow khriñ leh ya kiwa uiñke suwari.
Ong haroh u wa i thmu pynyieñ ya u mot u Woh Kiang Nangbah man i leh chibynta u pynsah kynmoo ya ka pateiñ wow wan u tip ki ya u khlawait wa yakhun neibynta ka ri wa ka jaitbru.
Neiliang u Wailadmiki Shylla won ong u wa ini i kwah i angnood ka thaaiñ toh iwa da slem bha heiwa da pynkynmoo u wa ini i thmu toh iwa da lai nadooh u snem 2022, kamtæ pynsñiaw u i kmen wa ha kani ka kynti daw ye u pynman kaam, wei ya kani ka thaw u tip noh kam ka Kiang Nangbah Square.
Neiliang kiwa yahkhmat ka JSU da e khublei ki ya u Sanbor Shullai wa ya u Wailadmiki Shylla hajrong i chimkhia ki u wan pait sylli ya ka thaw wa pynkhreh u booh ya u mot wa chirynyieñ u Woh Kiang Nangbah.
Discussion about this post