Ka sorkar Assam da pteiñ ko wow pynman ya ka jylla kam ka ”Disturbed Area” namo ka wym em yei chngaaiñ sa 6 bnai nadooh ka 28-08-21 hapoh ka aiñ Armed Forces (Special Powers) Act (AFSPA), katkam wa pynbna da ka sorkar ha ka 11 tarik uni u bnai.
Ka AFSPA toh kawa da pynkrehkaam ha Assam nadooh u Khonchonglad (Nov) 1990 wei da pteiñ ya ka man ka 6 bnai hadien wa pait ka sorkar yei long i man.
I kajiak wa da pynbna, da ong wa ka sorkar katkam ka kyndon Section 3 ka aiñ Armed Forces (Special Powers) Act, 1958 da pynbna ya waroh kawi ka jylla Assam kam ka “Disturbed Area” hadooh 6 bnai nadooh ka 28-08-21 lada ym pyndam chwa ya ka.
Yei daw wa pteiñ ya ka AFSPA hapoh ka jylla toh i wym em pyntip wei ye u man leh neidaw wa ini wa dep da chah siat 5 ngut ki bru ha kiwa suba toh ki sieñ kieñ suloi ha Dima Hasao District ka Assam heiwa da chah thang leh ki Truck.
Ha ka thaaiñ Northeast, ya ka AFSPA da pynkrehkaam hapoh ka Assam, Nagaland, Manipur (lait noh ki thaw wa em hapoh ka Imphal Municipal Council Area), Changlang, Longding wa Tirap District ka Arunachal Pradesh wa ki thaw wa em hapoh i pait ki 8 tylli ki Police Station wa em ha khappood ka Arunachal Pradesh wa Assam.
Ha kiwa boon ki thaw, ki seiñ ka imlang sahlang da pyrchah ki yei pynemkaam ya kani ka aiñ kawa da e bor ya ki chipai wow leh yei kaam yong ki khlem da hap wow paan bor.