Shillong: Ka liang synchaar ha KHADC ka People’s Democratic Forum (PDF) wa da yahkhmat da u CEM, u Pynshngain N Syiem ynne ka sngi da kylla cha ka People’s Democratic Alliance (PDA) wa yakhmat hi da oo.
Hawa yaklam wa kiwa pathai khubor hadien wa da kut ka yalang, u P.N. Syiem da ong wa kani toh ka sien wa nyngkong wa pynkylla ya i pyrtuid yong ka dhab synrop wei i pynkylla ya i pyrtuid yajan i wa i yong ka sorkar jylla wa da yahkhmat da ka NPP, ka Meghalaya Democratic Alliance (MDA).
Da ong u wa hadooh ynne ka PDA em ko 18 ngut ki MDC na ka 29 ngut wa kynthup ya ki 11 ngut na ka PDF, 1 na ka BJP, 1 MDC samen, 1 MDC ka UDP wa 4 ngut na ka NPP.
Da ong u wa nalor i pynkylla ya i pyrtuid ha KHADC neiliang ka PDA da chim leh ya ka rai wow wanrah ya ka mang tyngka kawa neibynta waroh chisnem ha kani ka dorbar wow wan wei daw paan bor leh na u Chairman wow rah ya ka dorbar cha ka 27 tarik heithaw ka 20 tarik khnang wow ye u pynkhreh pura ya ka dorbar mang tyngka.
Heiyatoh wa i kyrchaan u MDC ka HSPDP, u Samlin Malngiang uwa man leh u Montri ka sorkar jylla, neiliang u PN Syiem da ong u wa i yaklam dang man i iwa lai bait ymdu wa ka HSPDP wa ki MDC ka UDP leh kamjooh.
Na ini da sñiawthooh wa ya ka dorbar mang tyngka ha KHADC ye u rah cha ka 27 tarik uni u bnai lada pdiang u Chairman ya ka.
Hawa jubab ya i em uwi u MDC ka UDP ha ka PDA katwa kiwi won em ki ha ka liang pyrchah neiliang u CEM da ong u wa ha KHADC ympu krehkaam ka bynta wa chiphaw wa i kyrchaan ki MDC ya kawon kawon ka dhab neibhah i mon yong ki toh i mon samen yong ki hi-eh.
Heiyatoh wa i pynbaad uwa yahkhmat ka liang pyrchah, u Manstudy Nongrem wa u CEM da pynemkaam bakla u ya ka poisa T. 28 klur, u Pynshnain da ong u wa kam u CEM emkaam wow pynkrehkaam ya ki scheme wei emkaam leh wow phah ya ki UC cha ka sorkar pyrdi khnang wow tip ha iwon i rukom da pynlut ya ka poisa.
Discussion about this post