Shillong: Ka sorkar jylla ynne ka sngi da rai ko wow pynlait noh ya i psiah i mih hapyrdi ki District kiwa em ha ka jylla hadien wa ka sorkar India da pynyinsur ko ki yei khang yaka ri waroh kawi.
Hawa klam ynne ka sngi, u Symbood Montri Rangbah ka jylla, u Prestone Tynsong da ong u wa ha Meghalaya, ka sorkar da elaad ko ya kiwa chong chnong wow lai na kawi ka ka District cha kawi won wei ini i rai yong ka sorkar daw krehkaam i syndon.
Da ong u wa hawa yatoh wa i pynliat noh ya i lai ki kari hapoh ka jylla, ka sorkar da rai ko wow elaad noh ya ki kari wow lai, kynthup ki kari samen (Private) wa ki kali kamai kit bru, wei ini i elaad u man ko leh hapoh sor Shillong, tangwa i lai yong ki kari u man bait ki du 50% wei ya ini da e kti haki Deputy Commissioner wow ynbait deilang waki District Transport Officer (DTO), heiwa yow pynbait ki lai da ki Odd wa Even Number, deilang leh wow bood yei pynrkhiñ ya iwa phah ka chnat i chait i khiah, ya kiwa ki bor District daw pyntip ki na i por cha i por.
Hawa kylli, u Prestone da ong u wa i rukom chong kari kamai hei yong sakhiat toh u kheiñ katkam wa jngai i thaw wa lai kamwa leh ha kiwi ki jylla, tangwa neidaw waka Meghalaya da jooh leh ko da iwa chong lang wei ya ini i pynbait da ekti ha ka chnat Transport wow pynbait wei toh u chong du 4 ngut wa uwa yah, tangwa lada ka chnat emkaam ko wow e yumut cha ka sorkar, daw yaklam manda em ka Cabinet Meeting.
Discussion about this post