Jowai: U MLA ka Jowai, u Wailadmiki Shylla ynne ka sngi da khut yalang u ya ki sahep ki chnat waphær waphær ka West Jaiñtia Hills wow booddien yei chah ktah namo i piah i pra iwa da mih na u slap wa ka la-ær ha kani ka tayaw wa dadep khamtam ha ka 26 tarik hapoh District.
Ha kani ka yalang da emlang leh u DC ka District, u Garod LNS Dykes.
Hadien ka yalang hawa yaklam wa kiwa pathai khubor, u Wailadmiki da pyntip u wa i haap i oor wa i jæd i pra wa mih kam ha ki sarok, ki yung wa kiwi kiwi da kynjoh hadooh T. 15 klur wow chna pynmiat biang ya ki.
Da pyntip u wa heiyatoh wa i oor khyndaw da hukum ya ka chnat PWD wow pynkhooid lut ko ya i khyndaw.
Heiyatoh wa ki hali wa ki thaw rep wa da chah ktah, da ong u wa kamwa 35% kiwa da chah ktah wei neiliang ki sahep dang booddien ki yeini.
Da ong u leh wa ki sarok leh boon bha kiwa da chah ktah ha kylleiñ ka District katkam wa pyntip ki sahep ka chnat PWD.
U Wailadmiki da pyntip u leh wa hadien wa yoh ya ki yukheiñ wa ka bui na ki sahep daw rah ya ki cha u Montri Rangbah wow kyrpaad ya oo wow pynsmat u leh yeiwa emkaam.
Discussion about this post