U Montri wa pait ya ka chnat i chait i khiah ha ka jylla, u Alexander Laloo Hek da pyntip u wa ka sorkar India da dep ko wow pynlait ya i su cha ki wakreh Accredited Social Health Activist (ASHA) lyngba ka National Health Mission nadooh u Duyatra (Jan) 2020, ya iwa da phah leh cha ka District Health Society.
Da pyntip u wa i pynlait ya ka poisa man ko neibynta i su yei yarap ki ya ka sorkar ha ini i wan yong ka khlam COVID-19, deiwa ong wa ha i sien wa nyngkong, itæ nadooh u Naitung (April) hadooh u Naikhynde, 2020 man ko T. 4.17 klur, ha ka sien wa ar da pynlait ya ka poisa toh nadooh u Naichiphaw, 2020 hadooh u Wisu (Mar), 2021 leh da pynlait T. 4.17 klur, wei ka poisa wa da pynlait ha i bynta wa le, itæ yong u bnai Naitung wa u Naisan uni u snem da man ko T. 1.60 klur iwa man du wow su neibynta ki ASHA hadooh u bnai Naiynru uni u snem.
Hawa kylli wa ki ASHA da lai ki chakhmat wow yakhih neidaw wym pu yoh ki yei su wa kiwi ki dawa, neiliang u Hek da ong wa ye u man wa kani ka poisa ym pu poi cha ka District Health Society næ ki DHS ym pu yoh ki wow pynlait ya ka poisa.
Ha iwi won i liang u Montri da kyntu u ya ki ASHA wow sangeh noh yei yakhih yong ki, wei wow lai leh biang yei kaam khnang wa ki paidbah wa emkaam ym chem ki yei eh ha kini ki por.
Hawa yatoh wa i dawa wow pynku yei su cha ki ASHA na ka T. 1000 chi bnai cha ka T. 5000, u Hek da ong u wa ka chnat i chait i khiah daw yaklam ko wa ka chnat muna tyngka yong ka sorkar jylla.
