U Montri ka chnat ki kaam pohyung ka jylla, u Lahkmen Rymbui da ong u wa hadooh ynne ka sngi da ye wow pynlait lut ya ki bru kiwa sahkut nei tkut u sarokbah NH06 hajan ka Toll Plaza ka Lumshnong.
U Lahkmen uwa man leh u Chairman ka Regional Committee yong ka Ri-loom Jaiñtia wow pait ya i long i man na i chah ktah ha u slap, da lai pait u leh ynnin ka sngi ya uni u sarok ryngkat ki heh pulit wa ki bor District, wei da pyntip u wa da ye wow pynlait lut ya ki kari khian, katwa ya ki kari heh dang chimpor hadooh wa ka NHAI u ye ko wow chna biang ya uni u sarok.
Da ong u wa ha i lai pait da em leh ki bynta ka sarok wa ka chnat PWD (Roads) wa ka NHAI hap ki wow pynbiang neibhah i sih i oor em i ha ka thaaiñ Umkiang wa Kuliang wei em leh ki bynta yong u sarok Ratacherra kiwa pynyoo dak wa da kaad kiwa hap wow leh yeiwa emkaam khnang wow lait na iwon iwon i maa.
Hawa kylli, da pyntip u wa katkam i chem wa da pynman ya ini i oor toh nei joor ware u slap iwa da wanrah ya i chlai um ki kchaaid wa ka um ha kiwa boon ki bynta, wei ha ki thaw ka um tooid bait ko du na iwi i thaw, wei toh iwa jia i wym poi pyrkhat.
U Lahkmen da ong u wa ka sarok NH6 toh kawa pynyabi chadooh Lower Assam, Mizoram wa Tripura, wei neiliang u Superintendent of Police ka EJH da paan chooh chooh u sa kamwa 25 ngut ki pulit pynlai kari ha itai i thaw wow pait leh lada mih iwon iwon i jia wa sñiawsih.
