Jowai: Kam chibynta ki thup Video Series “Beyond the Call of Duty”, ynne da pynlait won sa kawi ka Video wa e pyrtuid “Phenomenal Woman” kawa da e naam yaki pulit kynthai ka West Jaiñtia Hills District wei kamjooh yaka jylla waroh kawi kawa pynlait ha Conference Room, SP Office, Jowai heiwa da emlang u Superintendent of Police u Lakador Syiem, MPS, Additional Superintendent of Police u B. Chettri, u DSP u M.J. Marngar, DSP ka C. Lyngdoh, kiwi ki sahep pulit kamjooh ki wakreh ka Women Cell.
Kam wow pynkynmoo wa kini ki thup Video “Beyond the Call of Duty” da pynmih nyngkong neibynta ka District Executive Force kam chibynta i kreh yong ki pyrchah yaka khlam COVID-19, ka wa ar toh neibynta waroh ki wakreh wa em hakhmat dooh wow yalaeh pyrchah ya u COVID-19, ka wa le won toh neibynta ka ANTF Branch, kiwi da seiñdur da u Lakador Syiem, Superintendent of Police, West Jaiñtia Hills.
U Lakador Syiem hei klam wa tbian yong oo ynne ka sngi da klam u chaphang ki kaam wa da leh daki kynthai. Da yaroh u leh yaka Women Police Force yei kreh chitom yong ki nalor wa man ki kam ka khon, ka bei waka kurim deiwa kreh ki cha palat ya iwa da pynkit ha ki.
Ka Officer In-charge Jowai Women PS, Inspector E. Marwein da pynsñiaw ko yei sñiawngooh ya u Superintendent of Police u Lakador Syiem u wow lai noh wow chim yaka kaam wa thymme yong oo deiwa e khublei ya waroh ki kaam wa da leh u wa i yahluti kamjooh i e mynsien wei i sñiawthooh u ya kiwa ya krehlang wa oo.
U Additional Superintendent of Police u B. Chettri da e u ya ki ktien sñiawngooh kamjooh ya waroh kiwa da emkti wow chna ya ini i Video.