Shillong: U Montri Rangbah ka jylla, u Conrad K Sangma ye u wow pteiñ yaki kaam yong oo khlem da emkaam wow chong yaka Quarantine, hadien wa da dep wow paitbniah ya i nongmuna wei da chem wa man Negative ne wym em chah ktah. Ya ini da pynsñiaw da u Montri wa pait yaka chnat i chait i khiah ka jylla, u Alexander Laloo Hek.
Kam wow pynkynmoo wa u Conrad da lai u cha Manipur haka 20 tarik neibynta wow pynbait ya i kaam saiñpyrthai ha katai ka jylla, wei da liwan noh u khlem da sah ha katai ka jylla kawa da ku bha kiwa yoh ya u COVID-19 ha ki kajiak sngi wa da dep.
U Hek da ong u wa neidaw wa da dep Test wa man Negative, u Montri Rangbah ynne ye u wow lai biang cha ki kaam wa man ka sngi, deiwa pynrap wa katkam ki kyndon, ym du ya u Montri Rangbah næ ki bru wa em ha i bor, wei yaki bru paidbah leh ye ki wow sdang ya i kaam lada Test Negative hadien wa liwan ki na kiwi ki jylla khlem da sah miet, laitnoh lada ym pu yoh yaka Report, hap ki wow chong Quarantine ha yung.
