Shillong: Ynne ka sngi da pynman ya ka pynsñiawthooh paidbah wa ka pynpsiah pyrtuid hajrong ka Megha Health Insurance Scheme (MHIS) Phase IV ha Good Shepherd Hall, Jongksha, East Khasi Hills District heiwa u montri ka rep ka riang uwa man leh u MLA ka thaaiñ, u Banteidor Lyngdoh da man u kam u kongsan hei emlang u BDO, Mawkynrew C&RD, u L.T. Tariang, Additional District Medical & Health Officer, East Khasi Hills, u Dr. J.B. Ranee, State Programme Manager, MHIS, ka Sonata Dkhar, Rev. Fr. George Joseph, Principal, Good Shepherd Higher Secondary School wa kiwi kiwi.
U Banteidor da ong u wa kani ka Scheme daw yarap ko ya uwi pa uwi kiwa chong chnong ka jylla wow yoh myntoi na ka Health Insurance ka wow yarap chiboon ya ki paidbah.
“Ka MHIS toh ka kaam kawa kongsan dooh wa pynkrehkaam da ka sorkar jylla ha ki le snem wa da lai wei emkaam wow kynthup ya waroh ki bru hapoh jylla” da ong u Banteidor.
U Additional District Medical & Health Officer, East Khasi Hills, u Dr. J B Ranee, da ong u wa hapoh ka MHIS Phase IV i e yarap man i hadooh T. 5 lak chi manyung kamtæ wow kynthup ya waroh ki manyung daw e da ki e-cards wow yarap ya kiwa yoh myntoi heithaw yong kawi ka card chi manyung kamwa da leh ha ki snem wa da lai.
Kani ka Scheme ym kynthup ko ya kiwa kreh sorkar (jylla wa pyrdi) wei ye u yoh myntoi na ka du ha ki thaw sumaar wa da tipmit hapoh jylla wa cha baar.
Kiwi kiwa da klam kynthup ki ya u BDO, Mawkynrew C&RD u L.T. Tariang, State Programme Manager, MHIS, ka Sonata Dkhar wa u Rev. Fr. George Joseph, Principal, Good Shepherd Higher Secondary School.
Discussion about this post