Ka lehkmen ya ka sngi ki khynroo namo ka National Youth Day, da pynman ya ka ha Dkhiah West Sports Club Hall ynne ka sngi neibynta ka East Jaiñtia Hills District da ka yung krehkaam u District Sports Officer ryngkat ka Seiñ Khynroo Chnong Dkhiah West wa ka Meghalaya AIDS Control Society (MACS).
Da yoh i klam hajrong ka phang “AIDS & Youths” na ka Dr. Janirius Nongtdu kawa man leh ka dkhot ka MACS heiwa da kyntu ko ya ki khynroo wow kiar na ki kaam wa sih wei wymtoh wow yoobeiñ ya kiwa yoh AIDS.
Hajrong ka phang “Role of Entrepreneurship in Nation Building” da yoh i klam na u Danosha Tlang, uwa man u tre ka DD Spices, uwa da kyntu ya ki khynroo wym toh u yang ki ya i kreh sorkar tangwa emkaam wow man kiwa sarong hawa kreh ki dei khih yong ki hi. Da kyntu u leh ya ki bor District wa ka sorkar wow booh ya ki thaw ha waroh ki District khnang wa ki khynroo u ye ki wow seiñ khih.
Ya ka phang “Channelizing Youth Power for Nation Building” da klam da u Coming One Joy Tlang uwa man u waheh chnong ka Dkhiah West, wei oo da kyntu u ya ki khynroo wow embynta ki wow pynku ya ka ri ka muluk.
Da yoh leh i klam na u DSO, u Daniel Dan uwa man kam u kongsan ha kani ka sngi heiwa da kyntu u leh ya ki khynroo wow mih chaphrang wow kreh neibynta yong ki wei kamjooh ya ka imlang sahlang.
Da yoh ya i rwai wa ki chaad na ki khynroo khyllood ka chnong wei da ekti leh ya ki Participation Certificate cha ki khynroo khyllood wa da chimbynta ha kani ka sngi.
Chwa wow pynkut da yoh ya ki kyntien khublei na u Generous Shadap uwa man leh u President ka Seiñkhynroo Chnong Dkhiah West.
Da emlang leh ha kani ka sngi u Bakitlang Phawa, Kerlang Tlang, Dawniwan Salahe wa u Wanshiruplang Tlang.