Jowai: Katkam ka yutip wa tikna wa da yoh na ki pulit, da ong wa ynne ka sngi da lai ki cha Biar kawa em hajan ka chnong Raliang, West Jaiñtia Hills wow takit ya iwa jia ynnin i miet ha kani ka chnong.
Kam wow pynkynmoo heini, ynnin i miet uwi u bru wa tip kam u Kenny Papang da chah dung u ha ki bru wym tipmit wei hadien ini da chah thang leh ka kari TATA Winger kawa jooh yah u.
Katkam wa man katni u Kenny chah sumaar u ha Dr. Norman Tunnel Hospital, Jowai.
Ynne ki bor pulit da lai ki cha i thaw wa jia ini waroh wow pynman ya i takit wei da yaklam ki leh wa ki kattu katni ngut ki bru heiyatoh wa ini heiwa da suba wa ini ye i wow jia na ki kaam samen.
Chooh chooh ki pulit da e sonteri (Security) ki leh ya ka yung yong u Kenny wow lait u jia iwon iwon katwa dang pynman ya i takit.
Heijooh i por leh ki pulit dang yang ki wow chait noh u Kenny khnang wow ye ki u tip yeiwa jia wei yi wa emkti heini i kaam.