Ka Mihmyntdu Community Social Welfare Association (MCSWA) ha kani ka 28 tarik da pynman ko ya i pynsñiawthooh hajrong ka HIV/AIDS neibynta ki pulit ka West Jaiñtia Hills ha Conference Hall ka yung krehkaam u Superintendent of Police, Jowai wei ya kani ka yalang da kyrchaan da ka Meghalaya Aids Control Society.
Ya ka yalang da pynlai da ka Sunita Suna wei da yoh ya ki kyntien waiphang na u BD Marak, Superintendent of Police WJH wei da bood i klam na u Aris J Nongkynrih.
Ka Dr. JN Shullai kam ka bru chemphang da e ko ya i batai hajrong i chah beiñ wei chah kyntait ki bru wa em ya u khñiang kjut HIV heiwa da kyntu ko wa ymhoi u leh kamtæ ya kam kini ki bru.
U A. Lanong, Programme Officer ka Meghalaya AIDS Control Society, Shillong da batai u hajrong ki kyndon ka aiñ HIV and AIDS (Prevention and Control) Act, 2017.
U Malsom Biate, General Secretary ka Jaiñtia Network for Positive People (JNP+) da batai u yeiwa chem ki bru wa em ya uni u khñiang kjut wei kammon u chah sumaar ki kamjooh leh wow Register ha ART Centre, Ialong Civil Hospital khnang wow yoh yarap.
Ya ki kyntien e khublei da yoh na ka Sunita Suna kawa man ka Programme Manager ka MCSWA.
