U Montri rangbah ka jylla, u Conrad Kongal Sangma da ong u wa da phah pynsangeh chwa chipor yei thmu wow ekti wow pynlai ya ki 56 tylli ki Sub-station cha ka M/s Broadcasting Engineering Consultant India Limited (BECIL), Noida kat hadooh wa ye wow bichaar biang yeini i rai ha ka yalang ki montri.
I thmu ka Meghalaya Power Distribution Corporation Limited (MePDCL) wow ekti wow pynlai ya kini ki Sub-station da wanrah i yei pyrchah na kiwa boon wa kynthup ya ki seiñbhalang ki seiñ saiñpyrthai khamtam hadien wa ka MePDCL da phah ko ya ka chithi LOA cha ka BECIL ha ka 5 tarik uni u bnai.
Neiliang u Conrad Sangma da ong u wa ki Sub-station wa ka chnat Bordiñ thmu ko wow ekti ha ka BECIL toh kiwa thymme wei em leh kiwa ym em wa pait, wei kamwa man katni ka MeECL em ko hapyrdi i doohnong wa kynjoh cha ka T. 700-800 Klur wei i ekti ya kini ki Sub-station wow pynlai da kiwi ki Company daw pynlait ko yei lut neiwa thung bru da kiwa thymme.
Chooh chooh da ong u wa hanla ka MeECL da ekti ko ya kini ki Sub-station, tangwa katkam ka soskular ya ki wakreh ka Company hap thung da ki tre jylla.
Da ong u wa hadooh wa man kattæ ympu em i soi soskular wow pynlai noh da ka BECIL ya ki Sub-station ha ka jylla wei da phah pynsangeh chwa kat hadooh wa dep bichaar biang da ka sorkar wei hadien wa da hun waroh heitæ daw chim ya ka rai.
