U Working President ka United Democratic Party (UDP), u Titosstarwell Chyne da ong u wa ka Party hadooh ynne ka sngi ympu yoh ko ya ka chithi na u Eugeneson Lyngdoh wa ym yakhun de u ya ka Election MLA 2023, tangwa da yoo yeini du lyngba ki khubor.
Hadien wa poor smat ka khubor wa u MLA wa katni, u Eugeneson Lyngdoh ym bien de u wow yakhun ya ka Election MLA 2023, ka UDP ha Mawphlang da hap thooh noh ko da kiwi ki kyrtong wei da mih chiboon ki pyrtuid kiwa kynthup ya u George Sunn uwa man u khon u JA Lyngdoh, em leh kiwa da kam wa ka UDP kwah ko da uwa yahkhmat ka PDF, u Auspicious Lyngdoh, wei dang ini wadep u heh warim ka FKJGP, u Wellbirth Rani leh da psiah u cha ka UDP da i thmu wow yakhun ya ka Election MLA na Mawphlang Constituency.
Hawa kylli, u heh ka UDP uwa man leh u CEM ka KHADC da ong u wa u Eugene da klam u ha ki kattu katni ngut kiwa yahkhmat wa ym kwah de u wow yakhun ya ka Election, wei kam ka Party ympu yoh ko iwon iwon i thoh na oo. U Titos da ong u wa ka Party dang khuslai ko wow chna ya ka UDP Mawphlang Circle chwa wow pynphet ya ki kaam.
Chooh chooh hajrong i mih ka khubor wa ka UDP kwah ko ya u Auspicious Lyngdoh uwa man u General Secretary ka People’s Democratic Front (PDF) wow yakhun ya ka Election na Mawphang, hanla u Auspicious dadep pynbna kam u kyrtong ka PDF, neiliang u Titos da ong u wa ka Party ympu em pyrchang ko tangwa boi daw em i pyrchang samen yong kiwon kiwon kiwa maya ya ka Party.
Heijooh i por hajrong u kyrtong ka UDP na Mawphlang, u heh ka Party da ong u wa manda dep chna ya ka Circle daw leh kamwa toh rukom wow kreh deiwa khut ya ki kyrtong kiwa em i thmu næ kiwa kwah wow yakhun ya ka Election wei heitæ daw yoh ya u kyrtong.
