U Montri Rangbah ka jylla, u Conrad K Sangma chirup wa u Montri ka chnat Tourism, u Paul Lyngdoh ynne da wai ki ya ka Mawsmai Banquet Hall wa 32 tylli ki Luxury Suite ka Hotel Polo Orchid Resort ha Sohra, East Khasi Hills.
I pynheh ya ini i thaw toh deiwa sakhi yeiwa wan tooid kiwa uiñke suwari cha Sohra wei ini i thaw toh iwa chynna ya ka Kchaaid Mawsmai.
Hawa wai ya kini ki Luxury Suite wa ka Banquet Hall, neiliang u Conrad da yaroh u ya ka Polo Towers Group wa kynthup ya ki thaw wa janai hapoh ka Orchid Resort Sohra.
Chooh chooh u Conrad da yaroh u leh ya u Chairman ka Polo Towers Group wa da chynna jngai u wei da ong u wa ini daw yarap i ym du wow pynku ya ki kaam uiñke tangwa wot wow pynchlur i yakrehlang ki chnong wa ka sorkar.
U Conrad da yaroh u leh yeiwa da wanrah ya ki baam tynre, i rukom im wa kiwi ki kaam ha kani ka Resort heiwa daw yoh u sakhi ya ka jylla du deiwa lai ha kani ka thaw.
Da ong u leh wa i ku ki kaam uiñke suwari daw pynmyntoi bha i ya i yoh i laa ka jylla liang wanang heiwa da pynkynmoo u wa ha ki snem wa dadep i khayi pateiñ (Economy) ka Meghalaya man i kamwa 4.7 Billion US Dollars wei ha ki san snem wa dadep da ki i da ku da 10.5% deiwa kyrmen wow kynjoh i cha ka 10 Billion US Dollars ha u 2028.
U Conrad da ong u leh wa ka sorkar ym kular ko du wow pynku yei khayi pateiñ tangwa wot wow hoilang liang wanang ki paidbah waroh.
Da pyntip u leh wa kamwa Rs. 2,000 klur wa da pynlut ha ka jylla ha ki le snem wa dadep neibynta ki kaam uiñke suwari wei ka thong hi toh u kynjoh ko cha kamwa Rs. 4,000 klur ha ki snem wow wan.
Heijooh i por da ong u wa da ye leh u e kreh sak (Direct) namo lyngba kiwi ki rukom (Indirect) cha ki 50,000 ngut ha ki le snem wa da lai wei da kyrmen u wow pynku yeini cha ki 1 lak ngut ha ki 4-5 snem wow wan.
Discussion about this post