Ampati: Kam chibynta wow pynchlur ya kiwa psan mrad khamtam ki syiar, u MLA ka Salmanpara u Winnerson Sangma ynning ka 22 tarik da saam u ya ki syiar Kuroiler cha kiwa rep ka Zikzak C&RD Block, South West Garo Hills hei emlang ka MLA ka Mahendraganj ka Dikkanchi D. Shira.
Ha kani ka yalang wa chi sngi kawa da pynman da ka tnat Animal Husbandry and Veterinary Department hei yakrehlang wa ka Meghalaya State Livestock Mission, South West Garo Hills, da saam hadooh 1,230 tylli ki syiar kuroiler cha ki seiñ wa ki bru samen hapoh yong ka Special Plan Scheme. Da saam leh ya ki tiar wa e baam wa ki tiar wow pynkai um neibynta ki syiar.
Yeini da leh kam chibynta yong ka thong ka sorkar wow kyntu kynrong ya ka yoh ka kot ka rukom kamai yong ki paidbah ka thaiñ kiwa dang duna bha ha kani ka kaam psan syiar.
U Winnerson Sangma hei klam da kyntu u ya ki paidbah wow chim kabu ki ya kani ka jait khih heiwa da ong u wa ki syiar kuroiler toh kiwa smat heh bha bar ya kiwi tawon ki jait syiar wei ye u yoh chiboon i myntoi na ki. Da ong u wa ka syiar kuroiler wa le bnai ye u dai hadooh T. 1,200 kawi i wow yarap bha ya kiwa psan ya ki wow yoh lap ki.
Da pynkut u deiwa ong wa ka sorkar katni pynchlur ko ym du yei psan syiar tangwa wot hadooh wow psan sniang, blang wa ki masi.
Ka MLA yong ka Mahendraganj ka Dikkanchi D Shira da pynksan ko wa ki paidbah emkaam ki wow chim kabu ya ki scheme wa boonjait wa e ka sorkar khnang wow ye u wanrah yei ku ha ka khayi pateiñ.
Da ong ko leh wa ka sorkar lyngba ka IBDLP da wanrah ko chiboon ki rukom krehkaam wow ye u imja na ki tangwa boonsien hi kiwa yoh myntoi na ki ym em u chimkhia ki na mynsien wow pynkrehkaam ya ki.
Kiwi kiwa da em ha kani ka sngi toh u South West Garo Hills Deputy Commissioner u Cyril Darlong Diengdoh, u District AH& Veterinary Officer u P K Marak, u Zizak C&RD Block Development Officer u Reuben Momin, Zikzak AH&Veterinary Officer, Banni B M Sangma wa kiwi kiwi.
Discussion about this post