Ka National Commission for Protection of Child Rights deilang waka State Commission for Protection of Child Rights, Meghalaya deiwa ya krehlang waka Asia Foundation kamjooh ka New India Junction ynne ka sngi da pynman ki ya ka State Level Cum Sensitization Orientation Programme hajrong ka Pariksha Parv 4.0 ha State Convention Centre, Shillong.
Ha kani ka sngi da emlang leh u Metbah Lyngdoh, Speaker ka Meghalaya Legislative Assembly kam u kongsan, u Kyrmen Shylla, Montri ka chnat Social Welfare Department da man u symbood kongsan.
Kani ka Pariksha parv 4.0 toh ka thong krehkaam wa da wanrah da u Montri Rangbahdooh ka jylla u Narendra Modi deiwa sdang nyngkong ya ka kam ka Priksha Pe Charcha yow pynman ya ki Exam kam kiwa muja ki wym toh kiwa khia yaki khynnah yow lait nei pisa lang-a mynsien nadooh ki por wa pynkhreh Exam hadooh i por wa yaleh Exam.
U Metbah Lyngdoh hawa e yei klam da pynsñiaw u yei sñiawngooh ya u Prime Minister Narendra Modi wa da sdang u ya kani ka Pariksha Parv. Deiwa ong wa ini i buit thymme wow lehkmen ya ki Exam toh iwa biang bha wow leh lyngba ka Pariksha Parv, heiwa ki khynnah ye ki wow pynstiñ ya ka yukit wei yei pisa lang-a mynsien ki.
Da ong u leh deiwa e yarap kammon wow yaleh Exam, u pynkhreh, u thoh ya ki Exam daw yarap bha ko wow pynstiñ ya ka yukit ki khynnah. Da pynchlur u leh ya ka imlang sahlang wow yarap ya ki khynnah yow man ki kiwa khlan hei thij i pyrkhat yow ye ki leh wow chim yei bynta yong ki kam kiwa chong chnong wa da pynkhreh ya ka mynried. Da kyntu u leh ya waroh wow man ki bru kiwa yaleh yow pynyoh yei hok ki khynnah namo ka Child Rights wei wow tip bniah chaphang ini i hok.
Ha kani ka yalang da saam leh ya ka kot “Exam Warriors”, wa thoh da u Narendra Modi cha ki khynnah skur.
Kiwi de kiwa emlang ha kani ka sngi toh ka Iamon M Syiem, Chairperson SCPCR, Meghalaya, ka Rupali Banerjee Singh, Member Secretary NCPCR, ka Dr. Sujatha Sathpathy, Professor, Clinical Psychology, Department of Psychiatry, AIIMS New Delhi, ka Dr. Jyotsna Bharadwaj, Faculty for Diploma in Guidance and Counselling Course, Department of Educational Psychology and Foundations of Education, NCERT wa kiwi de.
