Ynne ka sngi u MLA ka 4 Mowkaiaw, u Nujorki Sungoh kam chibynta wow bood ya ki thong wa da booh u wow kreh kam u MLA, dei mynsien wa sñiawkhia da khut yalang u ya ki waheh chnong wa em hapoh ka Constituency wow pyrkhat kammon wow leh wow dawa pynku kyrdan ya ka Laskein C&RD Block kam ka Civil Sub-Division.
Ya kani ka yalang da pynman ha Yung Dorbar ka chnong Mowkaiaw, West Jaiñtia Hills heiwa da pynlai ya ka da u waheh chnong ka Mowkaiaw, u Loving Laloo.
Ha ka yalang da emlang leh ki 3 ngut ki MDC ka JHADC na ka thaaiñ, u Rudaioo Tang, u Winning G. Sungoh wa u Habahun Dkhar.
Neiliang u Nujorki da ong u wa ka Laskein Block toh kawi na ki Block wa rim dooh ha ka jylla ya kawa da sdang ha u snem 1973 wei em ko palat 100 tylli ki chnong wa palat 90,000 ngut kiwa chong chnong wei hawa pynchong yurim liang wanang da toh wow pynku kyrdan noh ya ka kam ka Civil Sub-Division deiwa kyntu wa ymtoh wow kheiñstiñ ya ini i kaam wow kreh khlem chong wow yoh u pynku kyrdan ya ka khnang wow pynyajan ya ka sorkar wa ki paidbah.
Da kdaw u leh wa ka Amlarem da man kam ka Sub Division wa ka Khliehriat won da man ko kam ka District (East Jaiñtia Hills) deiwa ong wa lada ya kini da pynku kyrdan, kat ya ka Laskein Block ymtoh de u chah kyntait ko.
Ki waheh chnong da kubur ki yei emkaam wow pynku kyrdan ya ka Laskein Block deiwa e leh jar jiar ki buit ki budia heiyatoh wa kammon wow pynku kyrdan ya ka neibhah wa da slem i por wa toh u pynku kyrdan ya ka dei pynsñiaw leh yei kyrchaan yei yahluti u MLA wa ki MDC hajrong ini i kaam.
Ha ka yalang da rai wow seiñ ya ka Joint Action Committee wow booddien ya ini i kaam wa ka sorkar.
