Ynne ka sngi ka Synjuk Waheh Chnong Jowai da chong yalang ki wa u Deputy Commissioner ka West Jaiñtia Hills, u Garod LSN Dykes chirup wa u Chairman ka Jowai Municipal Board (JMB), u F. War wa ka CEO ka Board, ka B. Blah wow yaklam hajrong i kaam wa yatoh wa i jhep ha chnong Jowai.
Hadien i yachem hawa yaklam wa u President ka Synjuk, u Alan Niangty da pyntip u wa neiliang ka JMB da paan por ko wow pynkhooid ya i jhep hadooh ka 6 tarik neibhah ynne chi sngi ymye wow pynkhooid ya i jhep.
Chooh chooh da pyntip u wa ka Synjuk da rai ko wow yang hadooh mynstep ka 6 tarik wei lada ym pynkhooid kattæ ym yohsa daw hap khang ya waroh ki yaw ha Jowai nadooh ka 7 tarik.
Hawa yaklam won wa u Deputy Commissioner, da pyntip u wa ki soo chnong kiwa kynthup ya ka Larnai, Thadmusem, Sohphoh wa Nongkhroh da chna ki ya ka Committee wei da pynman ki ya ka yalang paidbah ynnin heiwa da pdiang wow noh yei jhep heiwa ka JMB emkaam u bood ko ya ki kyndon wa da booh.
Chooh chooh da pyntip u wa ynne dang em sa soo san ngut ki bru na ka Elaka Nartiang Coordination Committee kiwa dang pynthut yeini i noh jhep tangwa ya ki daw leh katkam ki kyndon ka aiñ lada emkaam.
Hajrong i rai ka Synjuk wow khang ya ki yaw, neiliang u DC da kyntait u wow klam iwon iwon hajrong itæ dei kyrmen wa i kaam kattu u man i iwa lai wei wow yang ki sa chibet chipor donhi.
