U Symbood Montri Rangbah ka jylla, u Prestone Tynsong da ong u wa i pynkrehkaam ya ka Lockdown toh du kam ka laad wa khaddooh neidaw wa da chem hadooh katwon ktah ko ya ki bru ha kini ki ar snem wa da lai manda pynkrehkaam ya ka Lockdown khatam ha ka khayi pateiñ wa i kamai kajih.
Da ong u wa ka sorkar Meghalaya kamjooh leh kiwi ki sorkar jylla ym em kwah ki wow pynkrehkaam ya ka Lockdown.
Da kyntu u ya ki paidbah wym toh u hær-rngu ki wei wow man kiwa jai-jai deiwa kdaw wa ynne da em 50 ngut kiwa dang yoh ya u khñiang khlam wei ini ye i wow ku kat dang lai ki sngi kamtæ da kyntu u ya kiwa chong chnong wow syndong bha ki ya idæ deiwa myllieñ wow deiñ Mask wei wow lehkhooid ya ki kti wa kiwi de.
Da ong u leh wa da hap i wow tip kammon wow imlang wa uni u khñiang.
Heiyatoh wa kiwa yoh Omicron hapoh ka jylla da ong u wa ym de kiwa dang yoh wei ki dak ki chin ym toh kiwa joor lane ware kiwa yoh ya uni u jait wei ym em chitom ki wow riñ mynsien lane duna la-ær ki.
Da pynchlur u leh ya waroh kiwa da em 15 snem chaneiñ wow lai chim tika ki neibhah du ini i laad wow yada deiwa pynche yeiwa kylli kiwa boon iyi myntoi u chim tika lada dang ye u yoh ya u khñiang khlam heiwa da ong u wa i tika ye i leh wow pynduna yei joor i chitom lada chah ktah kamjooh leh yow yada nei yap.
