theme-sticky-logo-alt
theme-logo-alt
Advertisement ad1
Advertisement ad1

Yoh laad ki paidbah wow khang ya ka luti wa lai u Modi hadooh wa hap u liwan

Ynne i step, u Prime Minister, Narendra Modi da hiar u ha Bathinda Airport heiwa neini da toh u lai u cha ka National Martyrs Memorial wa em ha Hussainiwala da ka Helicopter. Tangwa neidaw wa joor u slap wei ym miat wow lai luti, u Modi da hap u wow yang 20 minit yow miat i bneiñ.

Hadien wym miat i bneiñ, da rai wow lai cha ka National Marytrs Memorial da u sarok iwa daw chimpor palat ar kynta wei da lai luti u da u sarok hadien wa da pyntikna wa da pynkhreh yei yada wa biang da u DGP ka Punjab Police.

Kamwa 30 Km na ka National Martyrs Memorial ha Hussainiwala, manda poi ki kari u Prime Minister ha ka yingkieñ Flyover, da chem wa da chah khang, chah kær ka luti da ki bru wa mih wow pynman yei pyrchah.

U Prime Minister da sahkut u ha kani ka Flyover kamwa 15-20 minit wei ini da man ko iwa da leh lait hei wow e yada ya u Prime Minister, da ong ka Home Ministry.

Chooh chooh da ong wa i lai i wan yong u Prime Minister toh kiwa da dep khana chwa cha ka sorkar Punjab. Wei katkam ka rukum hap ki wow leh, wow pynbiang yeiwa emkaam nadooh i e yada wei wow pynkhreh da kiwi de ki luti lada jia em iwon iwon i jia wym poi pyrkhat. Kamjooh leh kam chibynta i pynkhreh wa toh u leh da ka sorkar Punjab, hap ki wow pynbiang ya ki bru wow yada ha kiwon kiwon ki sarok tangwa ha ini i jia da yoo wa ym em leh yeini.

Kamtæ da hap pynpep yeini i lai u Prime Minister wei da uiñ biang u cha Bathinda Airport.

Neiliang ka Ministry of Home Affairs (MHA) da chimkhia ko ya ini i leh khalær wei da paan ko leh ya ka bui wa bniah (Detailed Report) na ka sorkar jylla deiwa phah leh wow kdaw ya kiwa emkti yow pynchitom ya ki.

Share this:
Previous

Khlaad noh ka Kong Melinda Suchiang

Next

Da sdang kit yei jhep, paan por ka JMB hadooh ka 6 tarik wow pynkhooid lut