Ka Meghalaya Lakadong Turmeric Integrated Development Mission da sdang ya ka ynne da u Minister ka MDoNER, u Jyotiraditya M Scindia deiwa emlang u Chief Minister ka jylla, u Conrad K Sangma, u Minister ka Agriculture & Farmers’ Welfare, u Timothy D Shira ha ka yalang wa man ha Sanchar Bhavan, New Delhi.
Kani ka Mission toh kawa Rs. 175.45 klur wa e poisa da ka Ministry of DoNER/NEC, Ministry of Agriculture & Farmers’ Welfare wa ka sorkar Meghalaya.
U Jyotiraditya M Scindia, da ong u wa kani ka sngi toh kam chibynta wow sdang ya ka Mission Golden Spice kamwa kwah u Prime Minister Narendra Modi wow pynku ya ka thaaiñ chaneiñ mihsngi.
Da ong u wa u Chyrmit Lakadong katni dapoi u cha ki yaaw ka United States, European Union, Japan wa ha thaaiñ Gulf.
Chooh chooh da e khublei u ya ki kynthai kiwa rep wei kreh chitom wow pynpoi ya ka India ha ka rynsan wow ryngkat wa kiwi ki ri ka pyrthai khamtam heiwa u Prime Minister da e u ya u Chyrmit Lakadong cha ki heh ki ri ha ka G7 Summit.
U Conrad K Sangma da ong u wa ka thaaiñ mihsngi da yoo ko yei kylla lyngba ka DoNER Ministry wei hapoh i yahluti u Jyotiraditya Scindia daw ye bha u kreh ha ki kaam rep wa ki kaam uiñke suwari.
Da pynrap u wa u Chyrmit Lakadong toh uwa phær dooh na Jaintia Hills ka Meghalaya neibhah wa man u uwa khlan bha ka Curcumin wei ym ye wow rep ya oo ha kiwi ki thaw ka Meghalaya du nei man kyrpang i khyndaw wa i suiñ bneiñ.
Da kular u leh wow kreh chirom wow pynman ya ka Mission kawa jop wei u man ko leh ka nongmuna ya kiwi ki kaam rep ha ka thaaiñ mihsngi.
Ha kani ka sngi da yoh leh i yaklam wa ka Padmashree Trinity Saioo wa ka Jhanika Siangshai wei ha ini i sdang ya ka Mission Lakadong Turmeric da pynyoo ya ka phlim Mission Lakadong Turmeric wa kiwi.
Ha kani ka sngi da emlang u Sukanta Majumdar, Minister of State, MDoNER, ka Secretary MDoNER, ka Nivedita Shukla, u Commissioner & Secretary ka Meghalaya, u Dr. Vijay Kumar D wa kiwi.
Kani ka Mission wa Rs.175.45 klur toh wow pynjanai yei pynpoi ha kylleiñ ka pyrthai ya u Chyrmit Lakadong uwa da yoh ya ka GI-Certified uwa mih du ha Meghalaya.
Chooh chooh ka Mission u pynman ko ya i rukom rep, i rukom song, i pynbna pyrthai khnang wow ye u chalan ya uni u chyrmit cha baar ri.
I por wow krehkaam kani ka Mission toh neibynta u 2026–2030 (5 snem) wow kynthup ya ka West wa East Jaiñtia Hills heiwa u myntoi ki palat 17,500 tylli manyung khamtam ki kynthai ki wow kreh ha ki karkhana wa ki kaam chalan. Da booh thong leh wow ye u pynmih hadooh 49,400 MT u chyrmit kat ha u 2030.
Discussion about this post