Maham ka KSU ya ki wym e laad ya kiwa pyrchah ya ka Shree Cement manda pynman biang ya ka Public Hearing

Ka Khasi Students’ Union (KSU) da yieñ skem ko wow pteiñ wow pyrchah ya i thmu ka Shree Cement Limited wow booh karkhana pynmih khyndaw-bilat ha Elaka Nongkhlieh, East Jaiñtia Hills District, deiwa ong wa emkaam leh u ap yei sur kiwa pyrchah.

U General Secretary ka KSU, u Reuben Najiar da e Wyrta u deiwa che cha ka sorkar wa lada pynman ya ka Public Hearing toh u e laad ya kiwa pyrchah wow pynsñiaw ki ym du kattu katni ya kiwa da jied kiwa kyrchaan ya itai i thmu.

Da ong u wa ki pulit leh ymtoh u yachah chiliang ki wei lada em kiwa khang luti ya ki paidbah wa pyrchah u lai cha ka Public Hearing, ki pulit u man ki kiwa bahkhlieh, heiwa da maham leh ya kiwon kiwon kiwa khang ya ki paidbah wa pyrchah wow lai pynsñiaw ha ka Public Hearing.

Hadien wa pyndam noh ya ka Public Hearing ka Shree Cement ha u June, ka Meghalaya State Polution Control Board (MSPCB) da pynbna ko wow pynman biang ya ka Public Hearing ha ka 31 tarik uni u bani July wei neiliang ka KSU da kyntu joor ko ya ki bor District wow e laad lang ya kiwa pyrchah wow emlang ha ka Public Hearing.

Uni u heh ka KSU da pynsñiaw u leh wa i em ki karkhana pynmih khyndaw-bilat ym em myntoi ko ya kiwa chong chnong ka jylla næ ka thaaiñ lada hei yoh kreh wa kiwi ki myntoi wa toh u e cha ka sorkar kam ka dan, tangwa iwa daw jia hi toh du i pynjæd ya ka mariang wa i wan seiñ chnong ki baar jylla. 

U Reuben da ong u wa ka Shree Cement thmu ko wow chna yabor ya ka karkhana, deiwa pynbaad wa ka sorkar kawa wanrah ya ka Shree Cement khlem da kheiñ yei thaw i bhaw ki paidbah kam ki tre. 

Related posts

Paan yarap uwa chong chnong ka Elaka Nongkhlieh yow beh syndon ya ka Shree Cement

August 11, 2026

Chimkti biang u Syiem Ainam Manik ya ka Hima Mylliem

August 11, 2026

Neiliang u heh ka KSU na East Jaiñtia Hills, u Pynshaiphar da ong u wa ka seiñ daw yieñ ko ha ka jooh ka yurim wow pyrchah ya ka Shree Cement wei ha ka Public Hearing ymtoh u khang luti ya kiwa wan kamwa da leh ha i por wa dadep.

Da ong u leh wa ka seiñ da chem ko leh wa em ki Mafia næ ki Gang wa khang luti ya ki dkhot ka seiñ heipor wa lai pynsñiaw ha ka Public Hearing deiwa pyntip leh wa kiwa pyrchah toh ki tre thaw kiwa em hali wa pynthor wei hajrong kani ka yurim da chah leh pynsih noh ki.