Shillong: Ka chnat wa pait yei rep i riang ka jylla, ynne da sdang ko ya ka Meghalaya Mushroom Mission ha ka yalang wa pynman ha Conference Hall, Main Secretariat. Heiwa ya ka yalang da pynlai da u K.N.Kumar, Additional Chief Secretary to the Government of Meghalaya. Ka Sber Majaw kawa man ka warep kawa da kynjoh 95 snem i rta na Law –Sohtun da man ko kam ka kongsan wei da pyllait leh ko ya ka Meghalaya Mushroom Mission Document.
Ha kani ka yalang da emlang u Colonel Ranjit Singh, Authorized Representative of Yats Corporation Company Ltd., Japan, kiwa mihkhmat na ka Hills Farmers’ Union wa kiwi kiwi.
Ka Meghalaya Mushroom Mission toh ka thong krehkaam wa san snem wei da mang wow pynlut T. 62.37 klur neibynta wow rep ya u tit.
Ka thnong yong kani ka Mission toh wow pynku yei rep tit heiwa katkam wa man uni u snem da pynmih 27 Metric tonne chi snem wei da booh thong wow pynmih cha ka 5000 Metric Ton hadien wa kut ka san snem kani ka Mission.
Kani ka Mission man ko leh ya ki 1000 ngut ki warep tit deiwa pynmih ya ki tit ha ki 7 district wa kynthup ya ka East Khasi Hills, West Khasi Hills, Ri-Bhoi, South West Khasi Hills, East Jaiñtia Hills, West Jaiñtia Hills wa West Garo Hills.
Ha kani ka sngi da soi leh ya ka soskular MOU hapyrdi ka chnat Agriculture, Meghalaya wa mihkhmat da ka M.N. Nampui, Secretary Agriculture, Yats Corporation Company Ltd. Japan wa mihkhmat da u Col. Ranjit Singh wa ka Hills Farmers’ Union, ya kawa da mihkhmat da u General Secretary, u Allfondbirth Kharsyntiew.
Ka Yats Corporation Company Ltd, Japan toh kawa pynmnih bha ya u tit wei daw e yarap ko ha kiwa boon ki liang ha ka kaam rep tit, wow khayi tit wa kiwi kiwi.
Discussion about this post