U Montri Rangbah ka jylla, u Conrad K Sangma deilang wa u montri ka sorkar pyrdi uwa pait ya ka chnat Ministry of Information and Technology (MeitY), u Ashwini Vaishnaw ynne da pynlait paidbah ki ya ka ‘MeghEA- Meghalaya Enterprise Architecture’, ka rukom e chakri wa thymme ka sorkar heiwa ya kani ka Project da pynwandur ha i rukom e chakri neiwa rim cha i rukom wa yah ka juk katni (Transform traditional service delivery process into a digital service system).
Ka IndEA toh ka thong krehkaam wa da sdang da ka sorkar India wow pynchlur ya ka Digital Governance ha ka ri wei wow pynsnmat ya i chakri ka sorkar heiwa ha ka jylla da tip ya ka kam ka MeghEA wow pynchlur ya i rukom krehkaam (Enterprise Architecture) wei wow e chakri katkam ka juk wa katni.
Neiliang u Ashwini Vaishnaw da ong u wa man i iwa sñiaw kmen wow e naam ya ka MegEA cha u Montri Rangbahdooh ka ri, u Narendra Modi wei da yaroh u ya u Conrad K Sangma wa man u Montri Rangbah wa dang khian dang khlan.
Da ong u wa ka MegEA daw yarap ko wow poi cha ka thong Digital India heiwa daw pynsuk ko ya ki bru wei kammon ka sorkar yaleh ko u pynmiat ya i rukom im yong ki.
Neiliang u Conrad K Sangma da ong u wa ka MeghEA man ko kam ka Blueprint namo ka luti wa da pynkhreh cha i krehkaam wa katkam ka juk wa katni wei da e khublei u ya ka NIC, KPMG, NeGD, MeitY yeiwa da leh ki.
Chooh chooh da ong u wa i pynkrehkaam ya ka MeghEA ha ki chnat daw yarap ko ya i rukom krehkaam ka sorkar wei dang emkaam wow esikai ya ki wakreh sorkar hajrong ini.
