Kam chibynta wow lehkmen ya ka Meghalaya Environment Week deilang waka Water Conservation Day, u C&RD Minister, u Hamletson Dohling ynne da sdang u ya ka Amrit Sarovar Campaign hapoh ka Mahatma Gandhi NREGA wa Community Nurseries haka yalang wa pynman ha chnong Umphrew, Mawlai C&RD Block.
Hawa klam ha kani ka yalang wai, u Hamletson Dohling da ong u wa i thong toh wow chna 75 tylli ki nan um ha kawi pa kawi ka District ka jylla. Man-u-snem ka jylla deilang waka pyrthai waroh kawi da kynmoo ki ya ka 5 tarik u Naiynru kam ka World Environment Day, heiwa ha uni u snem ka sorkar da rai ko wow lehkmen syndon chi tayaw yow pynkynmoo paidbah yei emkaam wow yada ya ka rymaw, da ong u.
Da ong u leh wa u bru deilang waka rymaw toh kiwa yajan bha kamtæ da emkaam wow syndong bha ya ka soodong sookun yong i kiwa da pynbiang ya waroh iwa emkaam i. Da kdaw u leh wa ka Meghalaya toh kawa da kyrkhu deiwa yoh chiboon u slap tangwa kattæ leh dang em i duna um wei da toh i por wow leh yeiwa emkaam wow kammon wow pynlang ya ka umslap kawa da e da ka bei rymaw.
Da kyntu u leh ya ki paidbah wow krehlang deiwa em i kitkhlieh wei wow chibynta yow yoh myntoi ka chnong ka thaw waka imlang sahlang waroh kawi. Da pynkynmoo u ya ki paidbah wa ini waroh man i iwa emkaam ym du ya katni tangwa ya ka juk wa daw wan leh kamjooh.
U Montri da khana u leh wa da em ka poisa kawa T. 450 klur kawa da booh bhah neibynta ki VEC ka jylla, heiwa na kani da dep pynlait T. 391 klur naka sorkar pyrdi yow thied ya ki tiar ki tar.
U Montri ha kani ka sngi da saam u leh ya ki Prize wa Certificate cha ki wajop haka yakob Drawing wa Painting wa pynman daka Umphrew Secondary School, Umphrew.
Hadien ini, u Montri leh da lai u wow pait yei thaw wa da thmu wow chna nan wei da pynman leh ya ka thung dieñ harood kani ka thaw.
Da em leh ha kani ka sngi wa u S C Sadhu, Mission Director, State Rural Employment Society, u P T Passah, BDO, Mawlai Block wa kiwi kiwi de.
